Қытайдың жетекші China Daily басылымы Қазақстан Президенті Қасым-Жомарт Тоқаевтың «Қазақстан мен Қытайдың берік әрі сенімді қарым-қатынасы – табысты ынтымақтастықтың кепілі» атты мақаласын жариялады. Бұл – қос ел арасындағы стратегиялық серіктестіктің жоғары деңгейін паш еткен маңызды оқиға.
Мақалада Мемлекет басшысы қазақ-қытай қатынастарының тарихи тамырына тоқталып, ғасырлар бойы жалғасып келе жатқан тату көршілік қарым-қатынастың бүгінгі таңда жан-жақты стратегиялық серіктестікке айналғанын айтты.
«Ғасырлардан тамыр тартатын қазақ пен қытайдың тату көршілік қарым-қатынасы өзара сенім, қолдау мен түсіністікке арқа сүйейді. Бүгінгі таңда осынау берік достық байланыстарымыз стратегиялық серіктестік пен мемлекетаралық ынтымақтастықтың үлгісіне айналды», – деді Қ.Тоқаев.
Президенттің айтуынша, екі елді бейбітшілік пен тату көршіліктің символына айналған 1700 шақырым ортақ шекара біріктіреді.
«Бұл тек географиялық шекара емес, сонымен бірге халықтарымыздың арасындағы сенімнің, достықтың және өзара түсіністіктің нышаны», – деп атап өтті ол.
Мақалада Қытай басшысы Си Цзиньпиннің көреген басшылығымен қол жеткізілген табыстарға да тоқталынды.
«Қытай әлемдік деңгейдегі көрнекті саясаткер саналатын Төраға Си Цзиньпиннің салиқалы басшылығымен таңғаларлық табыстарға қол жеткізді. Бұл табыстар жақын көршілеріне, соның ішінде Қазақстанға да жаңа мүмкіндіктер есігін айқара ашты», – деп жазды Тоқаев.
Сондай-ақ Президент қос елдің қазіргі серіктестігі уақыт сынынан өткенін, ал болашақта одан әрі нығая түсетініне сенім білдірді.
«Болашағынан көп үміт күттіретін жаңа кезеңге қадам басқан кезде уақыт тезінен өткен серіктестігіміздің қаншалықты мықты әрі терең екенін түйсіну өте маңызды», – деді Мемлекет басшысы.
Ол Қазақстан мен Қытайдың тек экономикада ғана емес, саяси және мәдени салаларда да байланыстары артып отырғанын атап өтті.
«Ортақ мұрат пен барлық бағыттағы ынтымақтастықты кеңейту арқылы соңғы жылдары өзара ықпалдастығымыз ерекше қарқын алды. Бұл – біздің елдеріміздің арасындағы сенімді серіктестіктің нәтижесі», – деді Тоқаев.