«Астана Опера» өз сахнасында гастрольдік сапармен келген Қарағанды академиялық музыкалық комедия театрының шығармашылық ұжымын қарсы алды. Меймандардың ересек аудиторияға ұсынған жарқын оперетталары, мюзиклдері мен Гала-концерті, сондай-ақ балаларға арналған қызықты музыкалық ертегілері мен қойылымдары «Астана Операның» жазғы репертуарына көрік берумен қатар елордалықтар мен қала қонақтарына ерекше көңіл күй сыйлады, деп жазады Egemen.kz.
Қарағанды академиялық музыкалық комедия театры «Астана Операның» тұрақты меймандарының қатарында екенін айта кеткен жөн. Оперетта мен музыкалық комедия дәстүрлерін ұқыпты сақтап келе жатқан қарағандылық ұжымның елордалық театрдың Үлкен зал сахнасында осымен бесінші гастроль аясында өнер көрсетуі – осы сөзіміздің айқын дәлелі.
Гастрольдік бағдарлама оперетта әртістері мен симфониялық оркестрдің және балет труппасының орындауындағы ауқымды Гала-концертпен ашылды. Түрлі күндері көрермендердің назарына И.Штраустың танымал «Сыған бароны», И.Кальманның «Баядера» оперетталары, сондай-ақ Р.Феррейннің «Некоторые любят погорячее» әңгімесінің желісі бойынша жазылған Дж.Стайнның «Джазда тек қана қыздар» атты күлкілі әрі екпінді мюзиклі ұсынылды.
Ұжымның жас көрермен үшін дайындаған И.Поляковтың «Етік киген мысық», О.Клюевтің «Сиқырлы гүл» және С.Цирюктің либреттосына «Алтын кілт» музыкалық ертегілері жазғы демалыста оқушылар үшін нағыз тосынсый болды.