Алматыда MOST IT HUB алаңында «Атамекен» Өңірлік кеңесі мен креативті индустриялар және IT бойынша Салалық кеңестің кеңейтілген отырысы өтті. ІТ-секторды нығайту және цифрлық экономиканы дамыту бойынша диалог пен бірлескен қадамдарды әзірлеу үшін маңызды тұғырнамаға айналған алаңға бизнес, технологиялық компаниялар өкілдері, инвесторлар мен индустриялық әріптестер жиналды, деп жазады Egemen.kz.
Қатысушылар Қазақстанда IT-саланы дамытудың негізгі мәселелерін, өнеркәсіптегі цифрландыру мен B2B-шешімдерден бастап венчурлік қаржыландыру және қаржы секторымен ынтымақтастық перспективаларына талқылады.
Жеке талқылау Aitu мессенджеріне арналды. Сервис мессенджердің, әлеуметтік желінің, бейне және музыкалық платформалардың, төлем жүйесінің және шағын қосымшалардың функцияларын біріктіреді. Қазір оның ай сайынғы аудиториясы 500 мыңға жуық пайдаланушы, ал жүктеулердің жалпы саны 6 миллионнан асты.
«Aitu, eGov, eGov Business, eOtinish сервистері мен ақпараттық жүйелері үшін нөлдік тарифтеуді қолдану мобильдік шоттағы нөлдік немесе теріс баланста азаматтарға мемлекеттік ресурстарға кепілді қолжетімділікті қамтамасыз етеді. Мұндай қадам халыққа қызмет көрсету орталықтарына түсетін жүктемені айтарлықтай азайтуға мүмкіндік береді және digital by default форматына көшудің маңызды кезеңі болады», деп хабарлады ҚР Үкіметінің баспасөз қызметі.
Aitu SuperApp қосымшасы әлеуметтік желілер мен жасанды интеллектіні байланыстырады. Платформада онлайн төлем жасау, өзге де қосымшаларды қолдану мүмкіндігі бар.
Цифрлық штабтың шешімімен:
биылғы жылғы 15 қыркүйектен бастап Aitu, eGov, eGov Business, eOtinish сервистері мен ақпараттық жүйелеріне қолжетімділікті қамтамасыз ету үшін нөлдік тарифтеуді қолдануды іске қосу;
биылғы жылғы 20 қыркүйекке дейін коммерциялық IT-шешімдерді Smart Bridge платформасындағы сервистермен кедергісіз интеграциялау мүмкіндігін қамтамасыз ету;
IT-шешімдердің шекті құны жөніндегі талаптарды алып тастай отырып, Qaztech платформасында ірі жобаларды іске асыру үшін тиісті құқықтық актілерге өзгерістер енгізу;
биылғы жылдың соңына дейін жасанды интеллектті қолдана отырып, мемлекеттік көрсетілетін қызметтерді цифрландыруды қамтамасыз етсін.
Aitu, eGov, eGov Business, eOtinish сервистері мен ақпараттық жүйелері үшін нөлдік тарифтеуді қолдану мобильдік шоттағы нөлдік немесе теріс баланста азаматтарға мемлекеттік ресурстарға кепілді қолжетімділікті қамтамасыз етеді. Мұндай қадам халыққа қызмет көрсету орталықтарына жүктемені айтарлықтай азайтуға мүмкіндік береді және digital by default форматына көшудегі маңызды кезең болады.
Нарыққа Aitu, eOtinish, Жедел төлем жүйесі, Digital ID, Әлеуметтік әмиян және т.б. сияқты танымал өнімдерді шығарған BTS Digital компаниясы қазір қызықты трансформацияны бастан кешуде. Компания басшысы Нұртай Әбілғалиевтің айтуынша, BTS Digital 2018 жылы құрылған.
«Біз адамдардың өмірін жақсартатын цифрлық шешімдер жасауды өзіміздің міндетіміз деп санаймыз. Бұл қандай да бір жобамен жұмысты бастағанда назар аударатын негізгі көрсеткіштердің бірі. Біз тек коммерциялық табысты ғана емес, пайдалы болғымыз келеді» дейді Нұртай Әбілғалиев.
Бұл ретте ол BTS Digital - мемлекеттік емес, жеке меншік компания екенін баса айтады. Әңгімелесуші атап өткендей, үкіметпен цифрлық мемлекеттік қызметтерді ұсыну бойынша сервистерді құру түріндегі ынтымақтастық - бұл жеке компания мен мемлекеттің әдеттегі өзара іс-қимылы.
«Біз нарықтың барлық қатысушылары сияқты мемлекет қандай да бір жобаларды құруға және дамытуға бастамашы болған кезде өз қызметтерімізді ұсынамыз. Байқауларға қатысып, тұсаукесерлер өткіземіз. Біздің күшті жағымыз - ол құрылған сәттен бастап қоғамға пайдалы болғымыз келеді. Мемлекет ірі тапсырыс беруші және клиент болып табылады, бірақ, қайталап айтамын, үкімет біздің контрагенттеріміздің бірі ғана болып табылады. Біз бизнеспен де белсенді өзара іс-қимыл жасаймыз. Мысалы, бірнеше жыл бұрын біз корпоративтік клиенттер үшін Aitu Passport қызметін іске қостық. Бұл құралды бірнеше қазақстандық банктер, қаржылық-техникалық платформалар пайдаланады, олар азаматтың жеке басын онлайн-тексеруді қажет етеді. Бұл қызмет бүгінде сұранысқа ие және біздің портфельдегі негізгі өнімдердің бірі болып табылады», деп атап өтті Нұртай Әбілғалиев.
Үкімет барлық мемлекеттік қызметкерлерді, оның ішінде дәрігерлер мен педагогтарды, сондай-ақ студенттер мен оқушыларды Aitu-ға ауыстыруды жоспарлап отыр ма деген сұраққа компания басшысы бұған жауап берудің кезі келмегенін айтты.
«Aitu тек мемлекеттік органдардың қызметкерлерін ғана емес, барлық ниет білдірушілерді қабылдауға дайын екеніне сендіре аламын. Біз мемлекеттік қызметшілердің коммуникациясының құралы болғымыз келмейді. Біздің жоспарымыз әлдеқайда кең - біз қазір барлық санаттағы азаматтар арасында танымал болатын тұғырнамаға айналу үшін бәрін жасаудамыз. Оның үстіне, біз тек өз елімізбен шектелгіміз келмейді - біз шетелдік нарықтарға да шыққымыз келеді. Оның үстіне, біздің білуімізше, Орталық Азия өңірі мен Кавказда біздікіне ұқсас жеке платформалар жоқ. Біз барлығымен ынтымақтасуға дайынбыз», дейді Нұртай Әбілғалиев.