Қазақстанда жол-көлік оқиғаларының алдын алу бағытында ауқымды шаралар қабылданып жатыр. Бұл Мемлекет басшысының Жолдауын іске асырудың басым бағыттарының бірі. Жаңа заңға сәйкес, орташа жылдамдықты асырғаны үшін жауапкершілік күшейтілді, мопедтерді міндетті түрде тіркеу енгізілді. Сонымен қатар ұсақ құқық бұзушылықтар үшін айыппұлдарды ескерту шараларымен алмастыру қарастырылған, деп хабарлайды Egemen.kz.
Биылғы жеті айда жолдарда 25 мыңнан астам тексеру жүргізіліп, қозғалыс қауіпсіздігіне қауіп төндіретін мыңдаған ақаулар анықталған. Қадағалаудың жаңа әдістері енгізіліп, дрондардан бастап автоматты тіркеу камераларына дейінгі технологиялар пайдаланылып жатыр. Соның нәтижесінде республикалық маңызы бар трассаларда жол апаттарынан көз жұмғандар саны 12%-ға азайған.
ҚР Ішкі істер министрі Ержан Сәденовтің айтуынша, жыл басынан бері жолдарда 8,5 миллион жол қозғалысы ережесін бұзу дерегінің жолы кесілген. Оның ішінде 14 мыңнан астам мас күйде көлік жүргізу фактілері бар.
«Бұл шаралар ауыр зардаптардың алдын алуға мүмкіндік берді. Бүгінде цифрлық шешімдер қарқынды түрде енгізілуде. Мәселен, құқық бұзушылықты тіркеу камералары, мобилді «жасырын» патрульдік жүйелер, дрондар, қауіпті жүргізушілерді анықтауға арналған «Қорғау» жүйесі. Автожолдарда орташа жылдамдықты бақылау жүйесі енгізілді, бұл осы аймақтардағы апаттық жағдайларды азайтты. Жол инфрақұрылымына бақылау күшейтілді», деді Ержан Сәденов