Биыл астықты алқаптар көз қуантады. Масағын әзер көтерген сабақтар сыңсып тұр. Көкшетау мен Қорғалжынның арасындағы ақық дән өсірілген ұшы-қиыры жоқ алқаптарда ел ырыздығының мол екенін аңғаруға әбден болады.
Зеренді ауданындағы «Виктровка» серіктестігінің 23,6 мың гектар жері бар. Оның 17,8 мың гектары – егістік алқабы. 6,8 мың гектар жайылым тұяқкес болмаған, алуан түрлі шөпке тұнып тұр. Егістік алқаптарда бидай, арпа, сұлы, бұршақ дақылдары, зығыр және мал азығына қажетті шөп егіледі. Диқандар техника паркін сақадай сай етіп дайындапты. Астық кептіргіш құрылғылар, механикаландырылған қырман да дайындалған. Серіктестік мемлекет тарапынан көрсетіліп жатқан көмекке разы. Көктемгі егіс, күзгі орақ кезінде жеңілдетілген бағамен қажетті жанар-жағармайын алады. Шаруашылық басшысы Виталий Гончаровтың айтуынша, биыл алғаш рет қант қызылшасын егіпті.
«Таңсық шаруаны бастадық, – дейді Виталий Гончаров. – Қара жердің қойнына дән еккен диқан жемісті еңбегіне сай нәтижеден де дәмелі болады емес пе, гектарынан 30 тоннадан өнім жинасақ деп отырмыз».
«Журавлевка-1» серіктестігі 122,8 мың гектар алқапқа дәнді, майлы, бұршақ дақылдары, картоп және көкөніс еккен.
«Егін орағы өте жауапты науқан, – дейді шаруашылық басшысы Қуантай Сұлтанов, – мемлекеттік қолдаудың арқасында машина-трактор паркінің 90%-ын жаңарттық. Су жаңа 64 комбайнымыз бар. «Кең дала» бағдарламасымен 6 млрд теңгеден астам қаражатқа тыңайтқыш, жанар-жағармай, техника сатып алдық. Биыл егін бітік өсті. Өткен жылы гектарына 18 центнерден өнім алсақ, биыл 23 центнерден бұйырар деп дәмеленіп отырмыз».
Ауыл шаруашылығы басқармасы басшысының орынбасары Ренат Қасеновтің айтуынша, өңірдегі егін 5,3 млн гектар алқапта өсіріліп жатыр. Алқап көлемі 2024 жылмен салыстырғанда 128 мың гектарға көп.
«Алдын ала болжамға қарағанда, егістік алқаптардың 80%-ындағы жағдай жақсы. Агротехникалық шаралар уақытылы жүргізілген. 4,2 млн гектар жерде арамшөпке қарсы өңдеу жұмысы жүргізілді. Топыраққа 273 мың тонна минералды тыңайтқыш сіңірілді. Осы ауқымды жұмыстың барлығы жеңілдетілген несие беру бағдарламаларының арқасында атқарылды. – дейді Ренат Қасенов. – Биыл 905 фермер 116 млрд теңгеден астам қаражат көлемінде қолдауға ие болды.
Ауыл шаруашылығы министрлігі Стратегия департаменті директорының орынбасары Арайлым Әлімбекованың айтуына қарағанда, биыл аграршыларға жеңілдетілген несие есебінде 700 млрд теңге қаражат бөлінген. Жеңілдетілген лизингке 250 млрд теңге қарастырылған. Биыл елдегі ауыл шаруашылығы дақылдарын жинау аумағы – 23,6 млн гектар. Оның 16 млн гектары – дәнді және дәнді-бұршақты дақылдар. Егіншілік департаменті басқармасының басшысы Бақыт Ілиясовтың айтуынша, биылғы орақ науқанына 38 мың комбайн, 138 мың трактор және 50 мың орақ қатысады. Әр литрі 274 теңге болатын 402 мың тонна жеңілдетілген дизель отыны бөлініпті. Бұл нарықтық бағадан 20%-ға арзан. Өткен жылдан бастап жеңілдетілген техника лизингі бағдарламасы іске қосылды. Әзірге 250 млрд теңгенің жартысы игерілген.
Ақмола облысы