Алматыда Халықаралық жастар күніне арналып өткізілген «Alma love» онкүндігі өз мәресіне жетті. Айрықша жоба қала әкімдігі Жастар саясаты басқармасының қолдауымен алғаш рет ауқымды деңгейде жүзеге асырылып отыр. Елдегі жоғары оқу орындарының үштен бірін құрайтын мегаполисте 150 мыңнан астам студент білім алатынын ескерсек, бірегей бастама студенттердің өз мақсаттарын жүзеге асыруына үлкен мүмкіндік сыйлады.
Балуан Шолақ атындағы спорт және мәдениет сарайында қорытындыланған іс-шараны 5 мыңнан астам көрермен тамашалады. Онкүндік аясында ұйымдастырылған 10 ірі жоба шығармашылық, спорт, білім, волонтерлік және экология бағыттарын қамтыды. Он күн ішінде квест ойындар, «Jastar Talks» мотивациялық кездесулері, экологиялық челлендждер, би жарысы, жастар көрмесі және «Жайдарман» ойындары 30 мыңнан астам арманшыл жасты бір алаңда тоғыстыра алды.
«Биылғы «Alma love» онкүндігі – жастардың әлеуетін ашуға, шығармашылық идеяларын жүзеге асыруға арналған ерекше жоба болды. Біз 10 күн бойы түрлі бағыттағы іс-шараларды ұйымдастырып, жаңа есімдердің жарқырауына жол аштық. Бұл – бір фестиваль аясында қала тарихында алғаш рет осындай ауқымдағы жобаны жүзеге асыруымыз. Жастар – Алматының дамуы мен жаңаруына серпін беретін күш. Біз олардың бастамаларын әрдайым қолдауға дайынбыз», дейді Алматы қаласы Жастар саясаты басқармасының басшысы Азиз Қажденбек.
Қай елдің де жарқын болашағы – жан-жақты білімді, ұшқыр ойлы талантты жастар. Аталған жобаның басты мақсаты әр саладағы дарынды жастардың басын қосып, олардың арман-мақсаттарына баспалдақ болу дейді ұйымдастырушылар. Аталған жобаны ұтымды идеясымен көзге түскендер үшін өз армандарын іске асырудың таптырмас мүмкіндігі деп атауға болады.
Гранд финалда Алматының дамуына түрлі сала бойынша үлес қосқан жас көшбасшылар мен волонтерлерге Алматы қаласының әкімі атынан алғысхат табысталды. Олардың қатарында эковолонтер, «Проект Вирус» экологиялық бастамасының жетекшісі Дулат Нәбиев те бар.
«Жастардың бастамасы – қоғамның қозғаушы күші. Біз табиғатты қорғап, экологиялық мәдениетті қалыптастыру арқылы болашағымызға инвестиция құйып отырмыз. Бізге жасалған қолдау – жас белсенділердің табанды еңбегінің нәтижесі», дейді Д.Нәбиев.
Кеш барысында Досекеш, Қанай, Еркеш Хасен, Қайрат Нұртас сынды отандық эстрада әншілері өнер көрсетті. Көрермендерге ерекше шоу бағдарламалар ұсынылып, жас өнерпаздардың қатысуымен өрбіген сахналық қойылымдар жылы әсер сыйлады.
АЛМАТЫ