Ұлттық экономика министрі Серік Жұманғарин «ADCB» Ислам банкінің басқарма төрағасы Гордон Хаскинспен кездесу өткізіп, ел экономикасына құйылатын инвестициялар көлемін арттыру мәселесін талқылады.
2010 жылы Қазақстан мен БАӘ арасындағы үкіметаралық келісім негізінде құрылған «ADCB» Ислам банкі – ТМД кеңістігіндегі алғашқы ислам банкі. 15 жыл ішінде қаржы институты еліміздегі түрлі жобаларға 3 млрд доллардан астам қаражат салған. Солардың қатарында Атыраудағы полиэтилен өндіретін зауыт (Silleno), АтМӨЗ бен ПМХЗ-да сутегі мен азот өндіру қондырғылары, теміржол инфрақұрылымын жаңғырту сияқты ірі жобалар бар.
Банк сондай-ақ «Даму» қорымен бірлесіп, экономиканың басым секторларындағы кәсіпкерлерге 25 млрд теңге бағыттаған. Қор басшысы Фархат Сәрсековтің айтуынша, бизнес тарапынан исламдық қаржыландыру құралдарына қызығушылық жоғары.
Кездесу барысында тараптар ислам банкингін Қазақстанның салық заңнамасымен үйлестіру жолдарын және ынтымақтастықты кеңейту перспективаларын талқылады. ADCB өкілдері болашақта қазақстандық жобаларға қаржыландыруды ұлғайтуды жоспарлап отырғандарын жеткізді.
Серік Жұманғарин банкке агроөнеркәсіп кешені, әсіресе мал шаруашылығы бағытына инвестиция құюды ұсынды. Себебі Қазақстан Таяу Шығыс елдеріне жоғары сапалы ет өнімдерін тұрақты экспорттап келеді әрі бұл нарық перспективалы бағыт ретінде бағаланып отыр.