География пәні бойынша Еуропа олимпиадасы (EGeo) Литва елінде өтті. Аталған білім бәйгесінде Қазақстан құрамасы жоғары нәтиже көрсетіп, жеті медаль жеңіп алды. Талдықорған қаласындағы №24 мамандандырылған лицейдің 9-сынып оқушысы – Дарын Бекбол топ жарды. Ол кіші (жасөспірімдер) санатында (12-15 жас) ең үздік атанып, алтын медаль иеленді, деп жазады Egemen.kz.
Оқу-ағарту министрлігінің хабарлауынша қола жүлдені Шымкент қаласындағы НЗМ-нің 9-сынып оқушысы – Микаэль Почукаев жеңіп алды.
Негізгі (үлкен) жас санатында (16–19 жас) Қазақстан құрамасының қоржынына медаль салғандар:
– Қостанай қаласындағы НЗМ 10-сынып оқушысы Андрей Енбахтов;
– Талдықорған қаласындағы НЗМ 12-сынып оқушысы Ақжол Болат;
– Ақтөбе қаласындағы НЗМ 12-сынып оқушысы Алихан Калмагамбетов;
– Павлодар қаласындағы НЗМ 11-сынып оқушысы Мансур Тұрсынғалиев;
– Талдықорған қаласындағы НЗМ 10-сынып оқушысы Рамиль Имашев.
Команданың жетекшілері мен жаттықтырушылары – республикалық және халықаралық олимпиадалардың бірнеше дүркін жүлдегерлері Абай Дүйсен мен Ақберен Айжарық.
Айта кетелік, EGeo олимпиадасы 2015 жылдан бері өткізіліп келеді. Басты мақсат – география және экология саласына қызығушылықты арттыру. Байқау үш кезеңнен тұрады: жазбаша тест, мультимедиялық тапсырма және дала туры. Барлық тапсырмалар ағылшын тілінде орындалады. 2024 жылы Қазақстан құрамасы алты медаль еншілегені мәлім.