«Қай жұрттың баспасөзі күшті болса, сол жұрттың өзі де күшті» деген Міржақып Дулаттың сөзін негізге алсақ, журналистердің жауапкершілігі мен қоғамдағы орны маңызды екені айқындала түседі.
Бала кезден газет-журналдан қол үзген емеспіз. Жылдар бойы үзбей жаздырып алып оқитын газетімнің бірі де бірегейі – «Egemen Qazaqstan». Басылымның тұрақты оқырманымын және мақалаларымды жолдап отырамын.
Тіршілігіміз Түркістан өңірімен тікелей байланысты болған соң да, газетті алған соң, бірден облысқа қатысты мақаланы іздеп, оқып шығамыз. Осы орайда Ғалымжан Елшібайдың өңірдегі өзекті мәселелерді талдап, тарата жазған мақалаларын, жазушы Мархабат Байғұт, ұстазы Темірбек Қожакеев туралы жазған толғау-эсселерін жалпы оқырман қауым жоғары бағалады. Сондай-ақ басылымның «Білім», «Әдебиеттің әңгімесі» бетін оқығанды ұнатамын. «Зерде», «Руханият» айдарымен жарық көретін журналистердің, авторлардың шығармалары да оқылымды. Көкшетаулық журналист Байқал Байәділдің «Қаз-қалпында» айдарымен жарияланып жүрген еңбектері өте шынайы. Ой салады. Бекен Қайратұлының этнографиялық этюдтері де қызықты. Жалпы, «Egemen Qazaqstan»-ның әр нөмірінен оқитын мақала көп. Дегенмен менің жеке пікірім, газеттің соңғы бетіне қойылатын «Нүкте» көрінбей қалды.
Ғалымжан ШӘМШІДІНҰЛЫ,
Жұмабек Тәшенов атындағы университет проректоры
Түркістан