Жуырда елордадағы С.Сейфуллин атындағы Қазақ агротехникалық зерттеу университетінде белгілі ғалым, профессор Шидау Иманғажин атындағы аудитория ашылды. Оған ғалыммен бірге қызмет істеген әріптестері мен шәкірттері, туған-туысқандары қатысты.
Салтанатты іс-шараның ашылуында университет ректоры, академик Қанат Тіреуов экономика ғылымы саласында өнегелі із қалдырған Ш.Иманғажиннің еңбегін ерекше атап өтті.
«Бұл аудитория – білім мен ғылымға арналған ғимарат ғана емес, ұлағатты ұстаздың рухына құрмет. Ол өзінің ғылымға деген адалдығымен шәкірттерінің жүрегінен жол тапқан тұлға», деді ол.
Сондай-ақ аталған жоғары оқу орнында онымен бірге қызмет істеген экономика ғылымдарының докторы, профессор Жасқайрат Сүндетұлы, ауыл шаруашылығы ғылымдарының докторы, профессор Айтбай Бұлашев, т.б. азаматтар сөз алып, ғалымның еңбектері мен оқытушылық қызметі туралы жылы естеліктерімен бөлісті.
Ш.Иманғажин 1954 жылы сол кездегі Ленинград қаржы-экономикалық институтты бітіріп келгеннен кейін, бар саналы өмірін ауыл шаруашылығы экономикасына арнады. Осы бағытта кандидаттық диссертациясын қорғады. 1967 жылдан бастап, өмірінің соңына дейін қазіргі Қазақ агротехникалық зерттеу университетіне қызмет істеді. Біраз жыл экономика факультетінің оқытушысы, деканы болды. Статистика кафедрасын басқарды.
Ғалымның көзі тірісінде 60-тан астам ғылыми, әдістемелік және оқу құралы жарық көрген. Оның ішіндегі студенттерге арналған 5 оқу құралын айрықша айтуға болады. 1989 жылы профессордың 1 оқу құралы әлемдік кітапхана арқылы АҚШ-та жарияланған. Бұдан бөлек, ол нарықтық экономика, статистика және цифрлық трансформация саласының дамуына елеулі үлес қосты.
Бір сөзбен айтқанда, ұзақ жыл бойы ғылым мен оқытушылық қызметті қатар алып, шәкірт тәрбиелеген Ш.Иманғажин атындағы аудитория болашақ экономика мамандарының білім ордасына айналмақ.
Алия ИСМАИЛОВА,
экономика ғылымдарының кандидаты, доцент