Л.Н.Гумилев атындағы Еуразия ұлттық университетіндегі Ақпараттық технологиялар факультетінің Жасанды интеллект технологиялары кафедрасы ЖИ саласындағы алғашқы мамандарын даярлап шығарды. Олардың 28-і – бакалавриат түлектері.
Аталған жоғары оқу орнында «Жасанды интеллект технологиялары» білім бағдарламасы еліміздің жаңа кәсіптер атласына байланысты 2020 жылы ашылды.
«Осыдан 5 жыл бұрын жаңа мамандықты ашқанда жақын арада ЖИ-мен жұмыс істейтін кадрлар сұранысқа ие болады ойладық. Бұл болжамымыз дұрыс болды. Алғашқы жылы студенттердің бір тобын ғана қабылдадық. Қазір жасанды интеллект бойынша білім алғысы келетіндердің саны төрт есеге өсті», деді Жасанды интеллект технологиялары кафедрасының меңгерушісі Бибігүл Разахова.
Бакалавриаттың төрт жылында студенттер компьютерлік лингвистика саласында машиналық оқытуды, деректерді талдауды, онтологиялық инженерияны, нейрондық жүйе қосымшаларын әзірлеу және табиғи тілді өңдеу бойынша білім алды. Сондай-ақ ұлттық және жеке IT-компаниялар мен орталықтарда тағылымдамадан өтті.
Бұл білім бағдарламасы «ASIIN» халықаралық агенттігінде аккредиттелген. Оны университет жұмыс берушілермен бірлесіп, олардың сұранысын ескеріп жасаған.
«Жасанды интеллект технологиясын меңгеру оңай емес. Бірақ оны қызықты ететін де осы күрделілік. Мамандық маған интеллектуалды өсуге тұрақты мүмкіндік берді. Тренинг барысында теория мен тәжірибенің жақсы үйлесімі құрылды. Біз «Python», «TensorFlow», «Scikit-learn», «PyTorch» сияқты құралдарды пайдалана отырып, нақты жобалар жасадық. Курстық жұмыста алған білімімізді тәжірибеде қолдандық. Сонымен қатар командалық жұмысқа атсалысып, ғылыми жобаларды іске асырып, хакатондарға қатыстық», дейді жас маман иесі Даяна Оспанова. Болашақта Даяна жасанды интеллект саласында инженер-сарапшы болып жұмыс істегісі келеді.
Бір айта кетерлігі, бұл мамандық бойынша біздің ғана емес, ТМД елдерінен келген шетелдік студенттер де білім алады. Оларға отандық оқытушылармен бірге АҚШ, Қытай, Малайзия секілді жетекші жоғары оқу орындарының ғалымдары дәріс оқиды.