«Тойдың болғанынан боладысы қызық» дегендей, күллі Алаштың көз тіккені – биылғы Абай тойы. Бұл көп тойдың бірі емес екені белгілі. Ұлы ақынның атын ардақтап, рухани мұрасын халқына дәріптеумен қатар хакімнің туған өңіріне тигізетін игі әсері көзделіп отыр. Сонымен, Абай елі той қамына қызу кірісіп кетті.
Бұл – тек Абай облысының ғана емес, еліміздің рухани өміріндегі маңызды оқиға. Мемлекет басшысы Қасым-Жомарт Тоқаев атап көрсеткендей, Абайдың 180 жылдығы – халқымыздың рухани дамуы үшін аса маңызды мерейтой. Осыған орай, Абай ауданында бірқатар жаңа жоба іске асырылмақ. Қарауылдағы тарихи-мәдени нысандарды абаттандыру, жолдарды жөндеу, туристік инфрақұрылымды дамыту бағытында біраз жұмыс қолға алынды. Тойға келетін туристерге арналған қызмет сапасын жақсарту және Абай мұрасына негізделген жаңа экскурсиялық бағыттар әзірлеу жоспарланып отыр. Аталған ауқымды істердің барысын пысықтау үшін облыс әкімі Берік Уәли Абай ауданында болып, атқарылып жатқан жұмыстармен танысты. Әуелі Жидебайдағы «Абай-Шәкәрім» кесенелерінде болды.
«Абайдың «Жидебай-Бөрілі» музей қорығы Мәдениет және ақпарат министрлігіне қарайды. Кешеннің өзі мен аумағына 2020 жылы ақынның 175 жылдығына орай ғылыми-реставрациялық және абаттандыру жұмыстары жүргізілген.
Қазір мұндағы амфитеатр мен кесененің төменгі бөлмелері жөндеуді қажет етеді. Облыс әкімі осы жерде министрлік өкілдерімен кездесіп, кесенеде жүргізілетін реставрациялық жұмыстардың уақтылы бітуін талқылады», дейді облыс әкімінің баспасөз қызметі.
Тойдың негізгі қорытынды іс-шаралары Абай ауданындағы Қарауылтөбеде өтетін болып отыр. Мерейтой аясында «Жеті қазына» ұлттық мәдениет, спорт және туризм фестивалі ұйымдастырылмақ. Қарауылтөбе – үлкен дала сахнасы, ат жарысқа арналған шеңбер, 400-ге жуық адамға арналған көрермен орны дайындалу үстінде.
Аудан әкімі Мейіржан Смағұлов пен барлық басқарма басшылары, құқық қорғау органдары және ТЖД өкілдері өңір басшысына мерейтойға байланысты атқарылып жатқан жұмыстар туралы баяндады. Олардың айтуынша, Қарауылтөбеде киіз үйлер қалашығына су мен жарық тартылған. Кәсіпкерлерге арналған аумағы 2 500 шаршы метрлік сауда орыны дайындалып жатыр. Жаяу жүргіншілер жолы жөнделіп, қосымша жолдар салынады.
«Осыдан үш ай бұрын, 22 ақпанда осында арнайы келіп, Абай Құнанбайұлының 180 жылдығына қандай іс-шаралар атқару керек, қандай қажеттіліктер бар екенін біліп кеткен едім. Облыстың бюджетін қайта қарап, оңтайландырып, тиісті қаражат бөлінді. Ауданға қажетті дүниелердің барлығын енгіздік. Қазір жол жөндеу, Жидебайға антенналық құрылғы орнату секілді жұмыс жүріп жатыр. Мерейтой қарсаңында пайдалануға беріледі. 180 жылдыққа орай елімізден, тіпті шетелдерден де келеміз деп отырған қонақ көп. Сондықтан мерейтойды жоғары деңгейде өткізуіміз керек. Бүгін үш ай бұрынғы қажеттіліктерге бөлінген қаражат қалай игеріліп жатқандығын көріп, танысуға келдім. Жоспарға сай жұмыс жалғаса береді», деді өңір басшысы.
Биыл ауданда бірқатар инфрақұрылымдық жобалар қолға алынған. Облыстық маңызы бар «Аягөз-Қарауыл-Семей-Қайнар» автомобиль жолының 84-99 шақырымы мен «Семей-Қарауыл» жолының 97-117 шақырымы аралығына орташа жөндеу жүргізіліп жатыр. Ал Қарауыл ауылында ұзындығы 3 шақырымға жуық екі көшеге асфальт төселсе, Тоқтамыс ауылына кіреберіс 5 шақырым жол мен елді мекеннің бір көшесіне асфальт салынып жатыр. Өңір басшысы жол жөндеу жұмыстарының барысын көріп, мердігерлерге уақтылы әрі сапалы аяқтауды тапсырды.
Семейден 200 шақырым шалғайдағы Тоқтамыс ауылында қазір 600-ге жуық тұрғын бар. Өңір басшысы мектеп мұғалімдерімен, ауыл ақсақалдарымен кездесіп, пікір алмасты.
«Тоқтамыс – Абай ауданының ең шеткі ауылдарының бірі. Осындағы халықтың ахуалымен танысайын, өздеріңізбен жүздесейін деп арнайы келіп отырмын. Былтыр ауылдарыңызға интернет қосылды. Биыл ауылдың жолын жасауға ақша бөлдік. Абай көшесінде бір шақырымға жуық жолға алғаш рет асфальт төселіп жатыр. Осы бағыттағы жұмысты жалғастырамыз. Өңірдегі ауылдардың ешқайсысы назардан тыс қалмайды», деді облыс әкімі.
Абай еліндегі ерекше тарихи әрі емдік орындардың бірі Қоңыр әулие үңгірі де назардан тыс қалған жоқ. Абай ауданының Тоқтамыс ауылы аумағындағы Ақтас тауындағы Қоңыр әулие үңгірінің тереңінде орналасқан жер асты көлі өзінің емдік қасиеттерімен танымал. Көлдің температурасы жыл он екі ай 5-7 градустан аспайды. Мұнда еліміздің түкпір-түкпірінен және шетелдерден туристер келеді. Қоңыр әулие үңгірі «Рухани жаңғыру» бағдарламасы аясында «Қазақстанның 100 киелі нысанының» қатарына енген. Туристік маусымда тарихи орынды шамамен 9 мыңға жуық адам тамашалайды екен.
«Қоңыр әулие – Абай облысындағы туристер ең көп келетін ерекше орындардың бірі. Осындай табиғи-мәдени нысандарды жаңғырту арқылы ішкі туризмді жандандыруға толық мүмкіндік бар. Хакім Абайдың 180 жылдық мерейтойына еліміздің әр аймағынан, шетелден де қонақтар келеді. Сондықтан бұл жер заман талабына сай болуы керек. Туризм басқармасына Абай ауданы әкімдігімен бірлесіп жаңарту жұмыстарын жүргізуді тапсырамын», деді Б.Уәли.
Ал біз де реті келгенде Абай саябағында болып, «Ауылына қарап – азаматын таны» жобасы аясында жүзеге асып жатқан әлеуметтік нысанның құрылысына және аудандық мәдениет үйінде жүргізіліп жатқан жөндеу жұмыстарына куә болып қайттық.
Абай облысы