Павлодар облысында Халықаралық есірткімен күрес күніне орай іс-шара өтті, деп хабарлайды Polisia.kz.
Ақсу қаласында есірткіге қарсы айлық басталды. Ол есірткіні тұтыну мен олардың заңсыз айналымына қарсы халықаралық күнге орайластырылған. Іс-шара мерекелік форматта ұйымдастырылды. Қонақтар концерт тамашалап, жасөспірімдер балалар шығармашылығы байқауына қатысты. Байқаудың мақсаты – балалар арасында есірткіге қарсы көзқарасты қалыптастыру.
Акция есірткі жарнамасы бар граффитилерді өшіру рейдтерімен жалғасты. Сондай-ақ тұрғындарға есірткінің заңсыз айналымына қатысудың құқықтық салдары түсіндірілді.
Айлық аясында профилактикалық іс-шаралар, жастармен кездесулер, дәрістер мен рейдтер өткізіледі. Мұның барлығы қоғамды есірткі қатерінен қорғауға бағытталған.