Өскеменде арқан тартудан республикалық турнир өтіп, еліміздің әр өңірінен отызға жуық команда қатысты. Атап айтсақ, бұл күнгі додада Астана, Ұлытау және Абай облыстарынан келген спортшылар күш сынасты.
Ұлттық спорт түрінен өтіп жатқан жарысқа командалар тыңғылықты дайындықпен келген. Жаттықтырушылар да турнир бойы командасына дем беріп, қолдау көрсетумен болды. Ал жарыстың түпкі мақсаты – командалар ішінен әдіс-тәсілі келіскен кіл мықтыларды іріктеу еді. Алайда, нақты іріктеу қараша айына қалды.
– Біз арқан тарту спорт түрін әлемдік деңгейде дамыту мақсатында республикалық турнирлер өткізіп жатырмыз. Бүгінгі сайысқа ерлер, әйелдер ғана емес, бірінші рет жастар құрамасы да қатысып жатыр. Солардың ішінен арқан тартуға ебі бар, білек күші бар жастарды үлкен жарыстарға шығаруымыз керек, – деді арқан тартыс федерациясының вице президенті Нұрлан Жабаев.
Жарысқа қыздар, ерлер, жасөспірімдер және қыз-жігіттер араласқан төрт категория бойынша командалар қатысты. Шығыстың шымыр қыздары да алаңға рухтанып шығып, қарсыластарын ойсырата ұтып жатты.
Аталған жарыстың жалпы жүлде қоры 1,5 млн теңге. Дегенмен, қатысушылар жүлде деп емес, әркім өз аймағының намысы үшін тартысқа түсті. Сайыс қорытындысы бойынша аралас командалық жарыста өскемендіктер Астанаға есе жіберіп алды. Ал Шығыстың намысын қорғаған ерлердің және әйелдердің екі командасы бірінші орынды қанжығаға басты.
Жастар арасында үздік нәтиже көрсеткен спортшылар Әзербайжанда өтетін халықаралық «Тұран» ойындарында арқан тартыстан бақ сынасады.
Шығыс Қазақстан облысы