Жақында Күләш Байсейітова атындағы Қазақ ұлттық өнер университетінде Дәстүрлі музыкалық өнер факультетінің ұйымдастыруымен Екінші дүниежүзілік соғыстағы Жеңістің 80 жылдығына арналған «Ер есімі – ел есінде» атты концерт өтті.
Ел басына күн туғанда қаншама аталарымыз бен аналарымыз жерімізді жаудан қорғауға аттанды. Солардың арасында өнер адамдары да Отан алдындағы парызын орындап, ұрпағының амандығы мен болашағы үшін жандарын қиып, шейіт кетті. Мәселен, Смағұл Көшекбаев, Ғабдұлман Матов, Мәлік Жаппасбаев, Ысқақ Уәлиев, Рамазан Елебаев секілді марғасқаларды атауға болады. Соғыстан аман-есен елге оралғандардың ішінде Рүстембек Омаров, Нұрғиса Тілендиев, Тұраш Әбуов, Самиғолла Андарбаев сынды өнер майталмандары бар.
Осындай ержүрек аталарды еске алуға арналған іс-шараны Қазақстанның еңбек сіңірген қайраткері, профессор Дәурен Ғылымов жетекшілік ететін Студенттік қазақ халық аспаптар оркестрі Мұрат Өскімбаевтың «Жеңіс» күйімен ашты. Дина Нұрпейісова атындағы республикалық қоғамдық қордың төрағасы, педагогика ғылымдарының кандидаты, профессор Төлеген Қуанышев пен Қазақстанның еңбек сіңірген мәдениет қызметкері, К.Байсейітова атындағы ҚазҰӨУ-дің профессоры Айтжан Тоқтаған Жеңіс күнін жақындатқан қаһармандардың ғұмыр тарихына тоқталды.
«Соғыс кезіндегі және одан кейінгі шығармаларды зерттеп-зерделеу – өнерлі аға буынның бізге қалдырып кеткен аманаты деп қабылдағанымыз орынды болар. Сол уақытта жазылып, тартылған күйлер мен орындалған әндерде мұң мен зарлы үндердің басым екендігі айқын байқалады. Себебі бұл кезеңдегі шығармалар баласы немесе жары қан майданға аттанып, қайтып елге келерін не келмесін білмейтін қапалы күй кешкен тұста, осындай сезімдердің нәтижесінде туындады. Мысал ретінде Кенен Әзербаевтың «Біздің Отан жеңеді», Смағұл Көшекбаевтың «Майданға» атты әндерін және Дина Нұрпейісованың «Майдандағы балама» атты күйін айтуға болады» деп атап өтті профессор Т.Қуанышев.
Концертте Құрманғазының «Ертең кетем», «Пабескі», «Лауышкен» күйлері, сондай-ақ, «Майданға», «Жас қазақ», «Өтті өмір», «Сүйген жар», т.б. әндер орындалды. Іс-шара бүгінде 100 жылдығы тойланып жатқан Халық қаһарманы Нұрғиса Тілендиевтің «Жеңіс салтанатымен» аяқталды.