Айналма жолдың ахуалы

Алты жолақтан тұратын «А1» санатындағы жолдың жалпы ұзындығы 66 шақырымды құ­райды. Өңірге келген бір топ Сенат депутаты Алатау қала­сын­дағы Үлкен Алматы айналма автожолын пайдалану басқармасына (ҮАААЖПБ) арнайы барып, автожол желісін дамыту мәселелерін талқылады.

Сенаторлар инфра­құры­лым­дық жобаны іске асыру нәти­же­сімен танысып, күре жолды пай­даланудың қазіргі жай-күйін бағалады.

«Жолды күтіп ұстауға 16 техника, 4 патрульдік машина сатып алынды. Тазарту жұ­мыс­тары жыл бойы үздіксіз жүр­гізіледі. Жұмысшылардың тұрақты әрі қалыпты жұмыс істеуіне бар­лық жағдай жасалған. Демалыс орны, асхана жұмыс істейді. Техникалары тексерістен өтеді және осында жасалады. Жарық сөніп, басқа да жағдай бола қалса, апаттық станса іске қосылады. Біздің міндетіміз – жол күтімін үзбей жүргізу. Тариф жыл са­йын айлық көрсеткіштерге байланыс­ты өзгеріп тұрады. Ай­талық, жеңіл машиналар 1 сағатқа 281 теңге төлейді. Бастапқы бағасы 241 теңге болған. Содан бері 2 рет өсті. Сондай-ақ жолдың тегістігі, бұрылатын радиустары көліктің сағатына 150 шақырыммен жү­руіне есептелген. Бірақ жол қауіп­сіздігін ескеріп, ғылыми-зерттеу институттары мен әкім­ші­лік полиция ұсынысымен жылдамдықты сағатына 120-дан асырмауды ескертетін жол белгілері қойылды. Жол-көлік оқиғасы болса немесе жолдың бір жолағы жабылса, жол бойындағы таблода ескерту хабарламалары беріледі», дейді ҮАААЖ күтіп-ұстау менеджері Нұрланбек Өмірбаев.

Жол пайдаланушыларға жағ­дай жасау үшін алдағы уақыт­та ҮАААЖ бойынан жанар-жағармай құю стансаларын, сервистік қызмет көрсету орындарын салу жоспарланған. Қазір жолға 7 жерден қосылуға болады. Енді 5 радиалды көше қосылса, көлік саны да еселене түспек.

«Әр тәулік сайын шамамен 80 мың көлік жүреді. Одан түс­кен қаржы мемлекетке аударылады. Мемлекет келісімшарт бо­йынша 16 жылда жасалған құ­рылысқа, күтіп ұстауға кеткен қаражатты өтеп береді. ҮАААЖ-да бастапқыда 38 мың машина жүрсе, бүгінде бұл көрсеткіш 80 мыңға жуықтады. Жол бойын­дағы Алматы облысына қарасты Талғар, Іле және Қарасай ауданы тұрғындары үшін жеңілдетілген тариф тағайындалған», дейді Авто­мобиль жолдары комитеті төрағасының орынбасары Бақтияр Жамбылов.

Сенат депутаты Әлібек Нәу­тиевтің айтуынша, іссапардың мақсаты – жергілікті жердегі жолдар­дың қалыптасуы, олардың дамуы және болашақтағы мәселе­сін бағдарлау.

«Еліміздің транзиттік әле­уеті өте жоғары. Осыған байланысты Мемлекет басшысы логистиканы дамыту жөнінде көптеген мәселені Үкімет алдына қойды. Өкінішке қарай, жергілікті жердегі республикалық деңгейдегі жолдардың сапасы мен жасалуы халықтың көңілінен шықпай жатыр. Бізде жол құрылысының ұзақ­қа созылуы, одан кейінгі сапа­сының төмендігі, жол қабат­тарының дұрыс төселмеуі үлкен мәселеге айналған. ҮАААЖ құры­лы­с­ының салынуы да 20 жылға жуықтаған, құны да қымбат. 16 жыл ішінде өзін-өзі ақтау керек. Банктерден түскен қаржыны келешек ұрпақ қайтаруы қажет және ол осы көлемде ғана емес, үстінде пайыздық қосымшалары бар. Қазір жақсы болғанымен, қайтарымы халық пен Үкіметке үлкен міндет жүктейді. Сондықтан осы бағыттағы республикалық мәселелерді саралап, оны Парла­менттік тыңдауда қарап, Үкіметке ұсыныстарымызды жолдаймыз», деді сенатор.

Сондай-ақ депутаттар «Алма­ты желдеткіш зауытында» болды. Кәсіпорын басшысы Марат Баққұловтың сөзінше, заманауи технологиялар мен жабдықтарды енгізу зауытқа бәсекеге қабілет­ті болуға, нарықта тұтынушы­лардың өзгеріп отыратын талаптарына бейімделуге мүмкіндік берді.

«Бұл басқа компаниялармен ынты­мақтастыққа және өнім ассор­тиментін кеңейтуге жол ашты. Біз қоршаған ортаны қор­ғау, энергия үнемдеудің үздік әлемдік технологияларын қолда­намыз. Кәсіпорын «TruLaser 3030» (Германия) лазерлік кесу машинасын, «Euromaс» (Италия) координаттық-тескіш баспақты, «TruBend» (Германия) табақты ию машинасын, «Salvagnini» (Италия) панель игіш машинаны, «Kuka» роботты манипуляторын, «AUBO» бірлескен роботын, «BORUNTE» өнеркәсіптік роботын, «Modula» автоматтандырылған қойма сақ­тау жүйесін пайдаланады. Қа­зір компания ағынды-сорғылы қондыр­ғыларды, жалпы айырбастау клапандары мен түтін аластағышты, сондай-ақ радиалды және осьтік желдеткіштерді қоса алғанда, өнімдердің кең ассор­тиментін шығарады. Өнім ішкі нарықта да, шетелде де сұранысқа ие», дейді компания басшысы.

Сенаторлар «Даму» кәсіп­кер­лікті дамыту қорынан қар­жылық қолдау алған бірқатар кәсіпорын қызметімен де танысты. Олар­дың қатарында «Teplostil» тер­мо­тақталар шығаратын зауыт, полиэтилен құбыры мен тамшылату тұрбасын шығаратын «Ирри­гатор Қазақстан» кәсіп­орны, «Бижан» ет өңдеу зауыты мен инновациялық және импортты алмастыратын жобаларды табысты іске асыратын басқа да кәсіпорындар бар.

Алматы облысы