Кәсіпқой бокстан орта салмақтағы WBC нұсқасының чемпионы Карлос Адамес күні кеше ғана Астанада франциялық Анауэль Нгамиссенганы бесінші раундта ұрып жығып, екі бірдей алтын белбеуін қорғап қалған Жәнібек Әлімханұлын жекпе-жекке шақырды.
30 жастағы Доминикан Республикасының өкілі БАҚ өкілдеріне берген сұхбатында: «Мен Жәнібекпен жұдырықтасуды көптен бері көздеп жүрген едім. Бірақ ортақ мәмілеге келе алмадық. Енді сәті келді деп ойлаймын. Егер осы жоспар жүзеге асса, жер-жаһан жанкүйерлері керемет шоудың куәсі болатыны анық. Әлімханұлының жақсы боксшы екенін мойындаймын. Оны өзі де дәлелдеп жүр. Бірақ ол мені ұтатындай дәрежеде емес», деп сенімді сөйледі.
Карлос Адамес кәсіпқой рингтегі жолын осыдан 10 жыл бұрын бастаған. Сол аралықта 26 кездесу өткізіп, 24 рет жеңіске жетті. 18 қарсыласын нокаутқа жіберді. Осыдан алты жыл бұрын бразилиялық Патрик Тейшейрадан ұпай санымен ұтылса, биыл ақпан айында ұлыбританиялық Хамза Ширазбен тең түсті.