Халықтық өнердің өрісін кеңейтіп, жұлдызын жарқыратып жүрген ұжымның бірі – «Қарасай жастары» театры десек, артық айтқандық емес. Атауы айтып тұрғандай құрамы өнер десе ішкен асын жерге қоятын талантты жастардан тұратын театр ұжымы әуел бастан нық тұрып, сахналық қойылымдары көрермен жүрегінен жылы орын алады.
«2015 жылы фольклорлық ансамбль құруға ниеттеніп, осы тұрғыда жұмыс істедік. Нәтижесінде, «Үш қоңыр» фольклорлық-этнографиялық ансамблі құрылып, 42 штатпен толықты. Осыдан кейін аудандық мәдениет үйінің сол кездегі режиссері Бағлан Қалманов театр ашу жөнінде ұсыныс айтты. Содан бастап талантты жастардың атсалысуымен алғашқы спектакльді дайындадық. Ол кезде арамызда дипломы бар бір ғана театр актері Әлішер Мұқашов болды. Қарасай ауданының 90 жылдық мерейтойына орай жазушы Нағашыбек Қапалбекұлының «Қарасай батыр» атты драмасымен театрдың тұсауы кесілді. Режиссер Бағлан Маратұлы қойған театрдың қанатқақты бұл спектаклі кәсіби тұрғыда жоғары бағаланып, болашағына жарқын жол ашты», – дейді театр негізін қалаушы, аудандық мәдениет, тілдерді дамыту, дене шынықтыру және спорт бөлімінің басшысы Күлжан Дүйсенова.
Көрермен жүрегіне жол тапқан тұңғыш қойылымы сәтті шыққан театр өнерпаздары қанатын қомдап, драматург Жабал Ерғалиевтің «Жан шырылы» пьесасын дайындады. Спектакль арқылы қоғамда белең алған келеңсіздіктерді қозғап, дабыл қақты. Осылайша, жұдырықтай жұмылып, өз алдына ұжым болып қалыптасқан өнерлі жастар кәсіби актерлердің деңгейіне жетеғабыл жұмыс жасауға төселе бастағандарын байқатады.
«Қарасай жастары» театры Абай Құнанбайұлының 175 жылдығына орай Бақыт Беделханұлының «Рух жыры» поэмасының желісі бойынша «Жүректің көзі ашылса...» атты поэтикалық драмасын ұсынды. Талантты режиссер Бағлан Маратұлы сахналаған қойылым 2021 жылы Талдықорған қаласы Сүйінбай атындағы Алматы облыстық филармониясында «Халықтық және жаңадан құрылған халықтық атағы бар» театр фестиваліне қатысып, 32 театрдың арасынан топ жарып, бас жүлдені иеленгенін ерекше атаған жөн.
Одан кейінгі кезекте драматург Төлен Әбдіктің «Біз үшеу едік» драмасын да сәтті сахналаған өнер ұжымы екі жыл бұрын Ғабит Мүсірепов атындағы Қазақ мемлекеттік академиялық балалар және жасөспірімдер театрында ақын, драматург, Халықаралық «Алаш» әдеби сыйлығының лауреаты Бақыт Беделханның «9 грамм...» интеллектуалды-поэтикалық спектаклін сахналады. Қойылымға келген көрерменнен ине шаншар орын болмады. Қазақстанның Еңбек Ері Асанәлі Әшімов жастар театрына алғыс айтып, батасын берген болатын. Спектакльді режиссер Жұлдызбек Жұманбай сахналаса, сазгер Қанат Ибрагимов дыбыспен көркемдеп, көрерменнің ыстық ықыласына бөленді. Сондағы жас актерлердің киелі сахнадағы шеберліктері мен табандылықтарына дүйім жұрт тік тұрып қошемет көрсетіп, қол соққан еді.
«Нар тәуекелмен» салмақты спектакльдер сахналадық. Сөйтіп, шеберлігіміз шыңдала түсті. Уақыт өте келе балаларға арналған «Бремен музыканттары», «Батыл көжектер», «Қадырдың бақыты», «Алдар көсе», «Құстар фестивалі» атты ертегілермен кішкентай көрермендерді қуантып келеміз. Көрермендердің көңілін серпілту мақсатында Ә.Оразбаев аударған С.Лобозеровтің «Қаладан келген мейман» комедиялық спектаклін сахналадық. Қойылым режиссері Әлішер Мұқашов болды. Бүгінде театрда режиссер Жасұлан Заманбек, театр актерлері Жарқын Рақымқаш, Абзал Әбдіхан, Жанар Берік, Шынар Бержанова, Дана Ерғазина, Айман Рахымбердиева, Нұрбек Алпысбай, Мадияр Орнықбай, оператор Нұрзат Қасқабаев сынды талантты жастар жұмыс істейді», дейді театрдың көркемдік жетекшісі Нұрбол Даңғыл.
Алайда сүттей ұйыған ұжымның кем-кетігі де жоқ емес. Ең алдымен, халықтық өнерді өрістетіп жүрген театрға керегі штат бірліктері болса, екіншіден, гастрольдік сапарға шығуға автобустың жоқтығы үлкен кедергі екені жасырын емес. Театр негізі қаланғалы бері костюмдері де жаңармағанын жасыруға болмас. Соған қарамастан ұлт руханиятының шынайы қазынасын байытып, қанатын кеңге жайған «Қарасай жастары» театрының жеті жылда жеткен жетістіктері көңіл көншітеді.
Алматы облысы,
Қарасай ауданы