Ұлтымыздың мәдениетін әлемге танытып жүрген Қазақстанның Халық әртісі, әнші Димаш Құдайберген өнерінің құрметіне Астанадағы №87 мектеп-гимназияда арнайы кабинет ашылды. Іс-шараға әншінің әке-шешесі Қанат және Света Айтбаевтар, мектеп оқушыларының ата-аналары, әнсүйер қауым қатысты.
Аталған кабинетті ашу барысы туралы сөз алған мектеп директоры Айгүл Оңдағанқызы: «Біз бұл кабинетті жасақтауға көп дайындалдық. Сондағы мақсатымыз – мектеп оқушыларының музыкалық білімін жетілдіріп, оларды еркін ойлы өрендер ретінде жан-жақты дамыту. Жапонияға барған сапарымда олардың білім саласында музыкаға ерекше көңіл бөлетінін түсіндім. Біз де мектебімізде сабақ үзілісінде он минуттық ән айту жобасы сияқты бастамаларды қолға алдық. Міне, бүгін Димаш сынды талантымыздың атында музыка кабинетін ашып отырмыз. Біз оқушыларымыздың ой-өрісін кеңейтіп, мектептен әлемдік деңгейге ұмтылсын деген ниеттеміз», деген ақжарма сөзін айтты.
Ал Димаш Құдайбергеннің әкесі аталған кабинеттің ашылуы мектеп оқушыларына шабыт сыйлап, олардың да арасынан әлемге танылған таланттар шығуына тілектестік білдірді әрі осы кабинетке әншіге тарту етілген сыйлықтардан саралап, жәдігерлер беруге де көмектесетінін айтты.