Президент іс басқармасы Медициналық орталығы «Заманауи хирургиядағы жоғары технологиялар» тақырыбында халықаралық ғылыми-практикалық форум өткізді. Екі күнге жалғасқан конференцияда әлемнің алдыңғы қатарлы хирургтері бас қосып, тәжірибе алмасты.
Нақтырақ айтсақ, конференцияға елдегі медициналық ұйымдардың жетекші мамандары мен АҚШ, Қытай, Словения, Кувейт, Германия, Ресей, Қырғызстан, Өзбекстан, Тәжікстанның дәрігерлері қатысты. Форумға келген мамандардың саны екі күнде 2 000-ға жетсе, тікелей трансляцияны 4 мыңға жуық адам тамашалаған. Бұдан өзге Президент іс басқармасы медициналық орталығының ауруханасымен қатар, Үндістан, Түркия ауруханаларының операция залдарынан тікелей трансляция тарады. Бұл күндері дәрігерлер кардиохирургия, нейрохирургия және қантамыр хирургиясы бойынша 6 пациентке тікелей эфирде операция жасаса, оны форумға жиылған мамандар бірге талқылады.
Конференцияның бірінші күнінде Президент іс басқармасы медициналық орталығы мен Қытайдың «Xuanwu Hospital» ауруханасы әріптестік байланыс туралы меморандумға қол қойды. «Xuanwu Hospital» – Қытайда 1968 жылы ашылған неврология мен нейрохирургия бойынша алғашқы ғылыми-зерттеу орталығы саналады. Халықаралық Маджида Сами нейрохирургия және нейробиология институты құрамына кіретін нейрохирургиялық клиника. Осыған қоса клиника ұлттық деңгейде неврологиялық бұзылыстар мен нейрохирургиялық ауруларды емдеуде, зерттеуде жетекші орталық деп танылған. Меморандум аясында екі елдің клиникалары тәжірибе алмасып, байланыс орнатады. Осы құжаттың арқасында эпилепсия ошағын анықтайтын Remebot роботы енді елдің барлық өңірі үшін қолжетімді болады.
ПІБ Медициналық орталығы ауруханасы директорының хирургия бойынша орынбасары Мыңжылқы Бердіқожаев жаңа құрылғының науқастарды емдеуде әлеуеті зор екенін айтты.
«Әрине, операцияны роботсыз да жасай беруге болады, бірақ ол ұзақтау өтеді. Аталған стереотактикалық құрылғы адам басына орнатылып, бас сүйегіндегі 13 тесік арқылы электродтарды қондырып, 3-4 күнде эпилептикалық ошақтың қай жерде екенін анықтауға мүмкіндік береді. Осы арқылы тек сол жерді күйдіріп, науқасты емдеп, сауықтырып жіберуге болады. Бұл технология қазір Президент іс басқармасы медициналық орталығы ауруханасының Эпилептология орталығында қолданылады. Келер жылдан бастап әр аурухана мүмкіндігі болса осы роботты сатып алып, қолдана алады», дейді нейрохирург М.Бердіқожаев.
Екі күнде хирургияның барлық бағыты қамтылды. Қонақтар мен жергілікті дәрігерлер ересектер мен балаларды емдеу мәселелері бойынша баяндама оқыды. Оның ішінде жалпы хирургия, урология, проктология, гинекология, кардиохирургия, нейрохирургия, қантамыр хирургиясы, интервенциялық хирургия, аритмология, оториноларингология, офтальмология, онкология сынды барлық бағыт назардан тыс қалмады.
Форумға Германиядан келген нейрохирург, профессор Данэль Хенги келешекте елдегі білікті дәрігерлермен тығыз әріптестік байланыс орнатқысы келетінін мәлімдеді.
«Бүгін мен нейрохирургиялық секцияға қатыстым. Өз басым әлемнің түкпір-түкпіріндегі әріптестермен тығыз байланыста болып, білгенімізді бөлісіп отыру, тәжірибе алмасу аса маңызды деп ойлаймын. Бұл ғылым, нейроғылым және инновация үшін қажет. Осындай форумдарға келгенде әріптестерімді, олардың жұмысындағы қызықты жағдайларды, сәттерді естіген сайын жаңа нәрсе үйренемін. Бүгін де сондай тың тәжірибеге қанықтық. Болашақта әріптестермен тығыз байланыста болғымыз келеді. Өйткені саладағы мамандардың бірінен-бірі үйренері көп», дейді профессор.
Мысырдың нейрорадиолог-дәрігері Ахмад мырза елімізге екінші мәрте келіп тұр екен. Оның сөзінше, 2019 жылмен салыстырғанда елдегі медицина әлдеқайда ілгерілеген.
– Менің нейрорадиология саласында жүргеніме 20 жыл болды. Кеше конференцияда «Механикалық тробоэктомия дәрежесі және АҚШ-тағы жүректің жедел ишемиялық ауруларын емдеу тәсілдері» тақырыбында баяндама жасадым. Дәрігерлер ишемиялық ауруларды дер кезінде анықтап, емдеуі үшін бірінші кезекте оның қандай күрделі ауру екенін түсінуі маңызды. Осы туралы айттым. 2019 жылы Мыңжылқы Сайлауұлымен бірге Алматыдағы орталықта болған едім. Сол кезеңмен салыстырғанда қазір сіздерде медицина жоғары деңгейде екенін, бір орында тұрып қалмай, дамып жатқанын көрдім, өзгерісті байқадым, – дейді нейрарадиолог.
Конференцияда мамандар «Эндоскопия», «Оториноларингология, офтальмология», «Ортопедия», «Урология», «Кардиохирургия» секілді бірнеше секцияға бөлініп, операция барысындағы түрлі тосын жағдайларда қалай әрекет ету керегін бірлесіп талқылады.