21-22 қаңтарда Қазақстан Республикасы Парламенті Сенаты Төрағасының орынбасары Асқар Бейсенбаев бастаған қазақстандық парламенттік делегация Ыстамбұлда Ислам Ынтымақтастығы Ұйымы Парламенттік одағының «ХХІ ғасырдағы қатерлерге жауап: жаһандық бейбітшілікті, сот төрелігін, тұрақтылықты және қауіпсіздікті орнықтыру» тақырыбына арналған 10-шы сессиясына қатысты.
ИЫҰ парламенттік форумы аясында қазақстандық делегация Түркияның Ұлы Ұлттық Жиналысының Төрағасы Ж.Чичекпен кездесіп, екіжақты ынтымақтастық мәселелерін талқылады.
Түркиямен стратегиялық әріптестіктің маңызы туралы айта келіп, А.Бейсенбаев Қазақстан-Түркия ынтымақтастығының түрлі салалардағы қарқынды дамуына тоқталды және екі елдің парламенттерінде жұмыс істейтін «Қазақстан-Түркия» парламентаралық достық тобының әлеуетін жан-жақты өрістету қажеттігін атап өтті. Кездесуге сенатор Л.Тұрлашов, сондай-ақ, Мәжіліс депутаты Т.Ибраев пен М.Ахмадиев қатысты, деп хабарлады Сенаттың баспасөз қызметі.