АСТАНА. 13 қаңтар. АҚШ-та Нью-Йорк прокуратурасы үйінде ер бала мен оның туған қарындасын құл ретінде ұстаған күдікті әйелді анықтады. Бұл туралы 24.kz-ке сілтеме жасаған egemen.kz тілшісі хабарлады.
Нью-Йорк тұрғыны Сук Йонг Пак Оңтүстік Кореядан келген ұл мен қызды 6 жыл бойы өз үйінде құл етіп жұмсап келген. Жергілікті прокуратураның хабарлауынша, күдікті оларды 2010 жылы Оңтүстік Кореядан алып кетіп, артынша балалардың ата-анасымен байланысты үзген. Жеткіншектердің құжаттарын тартып алып, үй жұмысына жегіп қойған. Сондай-ақ, ол балаларға дүкенде де жұмыс істетіп, еңбекақыларын өз пайдасына жаратқан.
Қазір Сук Йонг Пакке «балалардың еңбегін заңсыз пайдаланып, физикалық күш көрсетті және олардың аман-саулығына нұқсан келтірді» деген айып тағылды.
Талғат Райымбек.
Дерек, сурет: 24.kz.