Қазақстан игерілмеген алтын қоры көлемі бойынша әлемнің алғашқы он мемлекетінің қатарына енді. Ел 2300 тонна көрсеткішпен 10-орынды иеленді, деп хабарлайды Egemen.kz.
Аналитикалық GeoStatistica ресурсының деректеріне сәйкес, ең ірі қорлар Ресей мен Аустралияда – әрқайсысында шамамен 12 мың тоннадан. Бұл елдер алтын қоры бойынша әлемдік көшбасшылар саналады. Олардың қорларының жиынтық құны шамамен 1,7 триллион АҚШ долларына бағаланған.
Үшінші орында – Оңтүстік Африка (5000 т), одан кейін Индонезия (3800 т), Канада (3200 т), Қытай (3100 т) және АҚШ (3000 т) орналасқан. Ал үздік ондықты Перу, Бразилия және Қазақстан түйіндейді. Өзбекстан 1800 тонна қорымен ірі алтын қоры бар елдер тізімін аяқтайды.
Қазақстанның бұл рейтингтегі орны ұлттық тау-кен өнеркәсібінің жоғары әлеуетін көрсетеді. Қазіргі таңда елде жаңа алтын кен орындарын барлау мен игерудің зор мүмкіндігі бар. Әсіресе, Шығыс Қазақстан мен Қарағанды облыстарында геологиялық барлау жұмыстарының келешегі айқын. Дегенмен, қорлардың бір бөлігі қолжетімсіз аймақтарда орналасқандықтан, инфрақұрылым мен өндіру технологияларына инвестиция тарту қажет.
Сарапшылардың пікірінше, өңдеу қуаттарын дамыту және экологиялық таза өндіріс тәсілдерін енгізу Қазақстанға әлемдік алтын нарығында өз орнын нығайтуға мүмкіндік береді. Шикізатты ішкі өңдеудің үлесін арттыру – ұлттық экономикада қосылған құнның өсуіне жол ашады.
Әлемдік үрдіске сай, алтынға деген сұраныс тұрақты өсіп келеді. Өндіріс көлемі баяулағанымен, орталық банктердің алтын сатып алу қарқыны артқан. Осы жағдайда ірі игерілмеген қорларға ие елдер, соның ішінде Қазақстан да, ұзақ мерзімді перспективада айтарлықтай артықшылыққа ие болмақ.