Алға ауданының Маржанбұлақ ауылында жаңа дәрігерлік амбулатория пайдалануға берілді. Бір ауысымда 45 тұрғынды қабылдауға лайықталған емдеу мекемесі Мемлекет басшысының ауылдық инфрақұрылымды дамыту жөніндегі тапсырмасын орындау аясында салынды.
Нысан құрылысына Арнаулы мемлекеттік қордан шамамен 190 млн теңге қаржы бөлінген. Заманауи құрал-жабдықтармен қамтамасыз етілген ғимаратта емдік кабинеттер, алғашқы жәрдем көрсететін және зертхана бөлмесі бар. Қазірде емдеу мекемесіне жалпы тәжірибедегі дәрігер, фельдшер мен бірнеше медбике жұмысқа қабылданды. Ақтөбе қаласынан 55 шақырым қашықтықта орналасқан Маржанбұлақ елді мекенінде төрт мыңға жуық адам тұрады. Республикалық маңызы бар автокөлік жолына жақын орналасқан осы ауылға жыл сайын қоныс аударушылар көбейіп келеді. Жұрт Ақтөбе қаласына не Алғаға қатынап дәрігерге көрінудің қиындығын айтып, Маржанбұлақтан ем-дом жүргізетін мекеме салынуын көптен ұсыныс етіп жүрген. Айта кету керек, Алға ауданында 44 мыңға жуық адам тұрады. Отыз елді мекені бар.
«Ауылда денсаулық сақтауды жаңғырту» ұлттық жобасы аясында бүгінде Ақтөбе облысында жүзеге асырылып жатқан 11 емдеу мекемесінің көпшілігі шалғай ауылдардағы дәрігерлік амбулаториялар. Биылдың өзінде төрт емдеу мекемесі пайдалануға берілсе, жеті құрылыс аяқталуға жақын. Осыдан бірер ай бұрын Ырғыз ауданы Жарма ауылы мен Байғанин ауданы Ноғайты ауылында емдеу мекемелері жұмыс істей бастады. Жыл аяғына дейін жаңа нысандарды іске қосу жұмысы жалғасады.
Ақтөбе облысы