16 қыркүйекте Алматы уақыты бойынша сағат 02:00 бен 04:00 аралығында Жер бетінде жаңа магниттік дауыл тіркелді. Бұл G1 деңгейіндегі (әлсіз) құбылыс болып саналады, деп хабарлайды Egemen.kz.
Қазіргі уақытта Жер ғаламаралық орта параметрлерінің өзгерістеріне бейімделіп, тұрақсыз тепе-теңдікке жеткен сияқты. Алғашқы соққы кезінде байқалған G3 деңгейіндегі бұзылыстар қазір жоқ. Бұл шамамен Күн тәжіндегі тесік арқылы өтудің бастапқы болжамына сәйкес келеді. Егер жаңа факторлар араласпаса, геомагниттік жағдай алдағы 2-3 тәулікте осылай сақталады. Одан кейін Жер бұзылған ғарыш аймағынан шығады, – делінген Ресей ғылым академиясының Ғарыштық зерттеулер институтының Күн астрономиясы зертханасы таратқан ақпаратта.
Сонымен бірге теріс жағдай ретінде күн желінің аса жоғары жылдамдығы аталып өтті.
Магнит өрісінің әлсіз реакциясы күн желінің магниттік өрісі энергиясының төмендігімен түсіндіріледі. Жылдамдықтың артуына қарамастан, энергия күрт төмендеп, Жердің магнит өрісіне түсетін қысымды азайтты, – деп толықтырды зертхана мамандары.