Президент Қасым-Жомарт Тоқаев биылғы Жолдауында еліміздің даму тарихындағы жаңа кезеңді айқындайтын бастаманы жария етті. Бұл – «Alatau City» жобасы. Мемлекет басшысы жаңа қаланың еліміздің іскерлік және инновациялық орталығына айналатынын атап өтті.
Президент нақты тапсырма берді: он күн ішінде қалаға арнайы мәртебе беру туралы Жарлық жобасы дайындалып, алты ай ішінде «Alatau City туралы» жеке заң қабылданады. Құжатта қаланы басқару режімі, қаржылық модель, инвесторларға кепілдіктер және тұрғындарға арналған әлеуметтік-экономикалық тетіктер қарастырылмақ.
Бұл бастама халықаралық тәжірибеге негізделген. Әлемде арнайы мәртебеге ие қалалар инвестиция мен технологияны тартудың негізгі орталықтарына айналған. Шэньчжэнь, Сингапур, Дубай – соның айқын мысалдары. 2 қыркүйекте Бейжіңде Қазақстан мен Қытай арасында келісім жасалды. Бұл құжатқа Ұлттық инвестициялық корпорация, «Caspian Group» АҚ және Қытайдың алып құрылыс компаниясы – «CSCEC International Construction Corporation Ltd» қол қойды.
Alatau City жеке инвестициялар есебінен салынады. Біз шетелдік инвесторлардың пулын құрдық. Бұл жобаға АҚШ, Оңтүстік Корея, Сингапур, Таяу Шығыс елдері де қызығушылық танытып отыр. Қазан айында Сеулде роуд-шоу өтеді. Оған «Hyundai», «Samsung», «Lotte» секілді алпауыт корпорациялар қатыспақ. Цифрлық қала – болашақтың бейнесі.
Алматы агломерациясында бой көтеретін жаңа қала Орталық Азиядағы алғашқы толық цифрлық қала болмақ. Мұнда Smart City технологиялары енгізіледі, криптовалюта арқылы төлем жасау мүмкіндігі пайда болады, жасанды интеллектіге негізделген басқару жүйелері қолданылады. Бұл қадамдар жаңа қаланың цифрлық экожүйе ретінде дамуына берік іргетас болмақ.
Жоба іске қосылғанда мыңдаған жаңа жұмыс орны ашылады, IT және жоғары технология индустриясы қарқын алады, шетелдік инвестициялар көлемі артады. Сонымен қатар жаңа қала жастарға білім мен жұмыстың заманауи мүмкіндігін ұсынып, жаңа урбанистикалық мәдениетті қалыптастырады.
Президент Қасым-Жомарт Тоқаевтың Жолдауында көтерілген бастамалар – еліміздің жаңа даму кезеңіне жол ашатын тарихи қадам. Әсіресе Alatau City жобасын жүзеге асыру туралы шешім – еліміздің инновациялық әлеуетін арттырып, елді халықаралық деңгейде жаңа биікке көтеруге бағытталған маңызды бастама.
Мемлекет басшысының батыл әрі стратегиялық қадамдарына ризашылық білдіреміз. Бұл бастамалар елімізді цифрлық дәуірдің көшбасшысына айналдырып, жаңа жұмыс орындарын ашуға, жастарға білім мен кәсіпкерлікке жол көрсетуге мүмкіндік береді. Президентіміздің сенімді басшылығымен еліміздің болашағы жарқын боларына сенеміз. Alatau City ұлттың жаңа дәуірге қадам басуының рәмізі болмақ.
Юрий ЦХАЙ,
«Caspian Group» АҚ директорлар кеңесінің төрағасы