Қазақстан Республикасы Конституциялық Сотының Төрағасы Эльвира Азимова «Конституция және мемлекеттілік: құқық және болашақ диалогы» халықаралық ғылыми-практикалық конференциясы аясында Қазақстан Республикасының Президенті атынан еліміздің құқықтық жүйесінің дамуына елеулі үлес қосқан адамдарға «Қазақстан Республикасының Конституциясына 30 жыл» мерейтойлық медальдарын табыстады, деп хабарлайды Egemen.kz.
Бұл медаль еліміздің Ата заңының 30 жылдығына орай тағайындалған. Сонымен қатар ҚР Конституциясының үстемдігін қамтамасыз етуге, ел тәуелсіздігін, қазақстандық қоғамдағы келісім мен тұрақтылықты нығайтуға, адамның және азаматтың конституциялық құқықтары мен бостандықтарын қорғауға, конституционализм идеялары мен қағидаттарын қалыптастыруға және дамытуға елеулі үлес қосқан Қазақстан Республикасының азаматтары мен шетел азаматтарына беріледі.
«Конституция – азаматтардың құқықтары мен бостандықтарының негізгі кепілі, тәуелсіздік пен мемлекеттік биліктің символы. Ата заңымыздың 30 жылдығын атап өту барысында біз өз еңбегі арқылы Қазақстанда және елімізден тыс жерде заң үстемдігін нығайтуға және демократиялық құндылықтарды ілгерілетуге үлес қосқан адамдарды құрметтейміз», деді Эльвира Азимова.
Марапатталғандардың қатарында жетекші құқықтанушы ғалымдар, конституционалистер, жоғары оқу орындарының оқытушылары, адам құқықтары және кәсіпкерлердің құқықтарын қорғау жөніндегі омбудсмендер, мемлекеттік органдар мен кәсіби заң қоғамдастығының, сондай-ақ халықаралық ұйымдардың өкілдері бар.
Сондай-ақ, Мемлекет басшысының атынан мерейтойлық медальдарды Конституциялық Сот Төрағасының орынбасары Бақыт Нұрмұханов Maqsut Narikbayev University алаңында өткен конференцияның сессиясы барысында, сондай-ақ Конституциялық Соттың судьясы Еркін Оңғарбаев Л.Н.Гумилев атындағы Еуразия ұлттық университетінің базасында өткен конференцияның сессиясы шеңберінде еңбек сіңірген адамдарға табыс етті.