Түркістан облысында «Мектепке жол» акциясы аясында өңір бойынша штаб құрылып, оған білім, денсаулық, жұмыспен қамту әлеуметтік бағдарламалар басқармалары, полиция, аудан, қала әкімінің орынбасарлары, білім бөлімінің басшылары енді.
«Үкімет қаулысына сәйкес әлеуметтік осал топ отбасының 5 санатына аудандық, қалалық білім бөлімдері тарапынан ата-аналарының немесе қамқоршыларының есепшоттарына аударылып жатыр. Жыл басында Ұлттық білім беру деректер қоры негізінде 55 654 бала анықталып, оған 2 млрд 415 млн 773 мың теңге мектеп формасы мен оқу құралдарын алуына қаржы қаралды. Бүгінгі таңда, ата-аналарының берген өтініштеріне сәйкес, аталған санаттағы 9 078 баланың ата-аналарының есепшоттарына 414 млн 016 мың теңге аударылды. Ата-аналарының берген өтініштеріне сәйкес, әрі қарай қаржыны аудару жұмыстары жүргізілуде», делінген облыс әкімдігі баспасөз қызметінің бізге берген мәліметінде.
Сондай-ақ аудан, қала әкімдіктерінде «Мектепке жол» акциясы шеңберінде әлеуметтік осал топ отбасының балаларына демеушілердің көмегімен оқу-құралдары мен мектеп формасы алып берілуде. Ал «Халық банкі» Түркістан қаласында орналасқан білім беру ұйымдарындағы 1-сыныпқа келетін әлеуметтік осал топ отбасының 200 баласына оқу құралдарын алып беруге демеушілік жасауда. Бұдан бөлек, аудан, қала әкімдіктерінде мектеп формаларын қолжетімді бағада сатып алу үшін шалғай елді мекендерде «Мектеп жәрмеңкелері» өткізіліп жатыр.
Айта кетелік, облыста биыл «Келешек мектептері» жобасы мен жаңа құрылыстар есебінен мемлекеттік мектептер саны 13-ке артып, 935-ке жетеді. Жаңа оқу жылында 1-11 сыныптарда 568 мыңға жуық оқушы білім алады деп болжанып отыр. Бірінші сыныпқа 48 мыңнан астам оқушыны қабылдау жоспарланған. Өңірдегі білім ұяларының жаңа оқу жылына дайындығы талқыланған жиында облыс әкімі Нұралхан Көшеров жауаптыларға білім ұялары 1 қыркүйекке дейін 100 пайыз дайын болуы керектігін айтып, нақты тапсырмалар берді. Білім ұяларын қатты және сұйық отынмен қамту, жылыту маусымына дайындау бағытындағы тірлікті де ширату қажет. Облыстық білім басқармасы басшысының міндетін атқарушы Ғалымжан Орыновтың айтуынша, «Келешек мектептері» жобасы аясында жоспарланған 29 мектептің 13-і пайдалануға беріліп, 9 мектепте оқу үдерісі жүрді, қамтылған оқушы саны – 7 694 (77%). 4 мектеп оқу үдерісін осы жаңа оқу жылында бастайды. Биылғы 1–30 тамыз аралығында 16 мектеп іске қосылады деп күтілуде. Мектептерді жаңғырту жобасына облыстың 115 мектебі енгізілген. Биылға жоспарланған 41 мектептің ішінде ағымдағы жөндеумен 15 мектеп, күрделі жөндеумен 26 мектеп қамтылды. Қазіргі таңда 41 мектептің қырығында бекітілген өндірістік кестеге сәйкес жұмыс жүргізіліп отыр. Биыл 6 күрделі жөндеу, 15 ағымдағы жөндеу жұмысы жүргізіліп жатқан нысандар пайдалануға беріледі. Қалған 20 нысан 2026 жылға өтпелі. Облыстағы мемлекеттік мектептің 798-і типтік, 124-і ыңғайластырылған ғимаратта орналасқан. Облыстық бюджет есебінен биыл 17 білім нысанының құрылысы жүргізіліп жатыр. Атап айтқанда, 11 мектеп пен 1 колледждің 120 орындық жатақханасы, 5 қосымша білім беру ұйымы салынып жатыр. Осы 17 білім нысанының 4-еуі биыл пайдалануға берілсе, қалған 13-і 2026 жылға өтпелі.
Білім беру ұйымдарын полиция департаментінің жедел басқару орталығына қосу жұмыстары да жүйелі атқарылып келеді. Қазіргі уақытта облыстағы 1259 мемлекеттік білім беру мекемесінің 827-і жедел басқару орталығына қосылған. Дабыл түймелері – 100% орнатылса, турникет жүйесі мен арнайы күзет қызметі толық қамтамасыз етілді. Жекеменшік секторлардағы мыңнан астам мекемеде дабыл батырмасы бар. 65 жекеменшік мекеме турникет жүйесін қойса, 500-ге жуық ғимаратта арнайы күзет қызмет етеді.
Түркістан облысы