2025 жылдың II тоқсанында бизнестің жалпы несиеге сұранысы тұрақты қалды. Алайда, ШОБ тарапынан белсенділік артса, ірі кәсіпорындар керісінше несие алуға құлықсыздық танытқан, деп хабарлайды Egemen.kz.
Ұлттық банк өкілі Динара Тазетдинованың айтуынша, ірі бизнестің бұл әрекетіне мемлекеттік қолдау бағдарламаларының шектелуі және несиенің жоғары құны негізгі себеп болған. Сонымен қатар, нарықтағы даму институттары ұсынатын жеңіл шарттар да банктермен бәсекеге түсіп отыр. Бұл кезеңде ірі компаниялардың несие өтінімдері 15%-ға азайып, 200-ге дейін қысқарған.
Ұлттық банктің мәліметінше, бизнес үшін қаржыландыру құны ұзақ мерзімді инвестициялық жобаларда шешуші рөл атқарады. Кейбір орта банктер жыл басынан бері қор жинау арқылы ірі жобаларды қаржыландыруды кеңейтуді көздеп отыр.
Орта және шағын бизнес тарапынан несиеге сұраныс артты. Бұл үрдіс «Өрлеу» бағдарламасы мен «Даму» қоры арқылы берілетін кепілдіктердің арқасында іске асқан. Айналым қаражатына мұқтаж, әсіресе сауда мен қызмет көрсету саласындағы кәсіпкерлер, мемлекеттік қолдау шарттарының қатаңдауына байланысты нарықтық банктік өнімдерге бет бұрған.
Кей банктер «Даму» қорымен бірігіп, техникалық деректер алмасу арналарын жетілдіріп жатыр. Сонымен қатар, жаңа өнімдерді ілгерілету мен маркетингтік әрекеттер арқылы сұранысты қолдау жұмыстары жүргізілуде. Сонымен қатар кәсіпкерлікті қолдау мақсатында несие өнімдерінің талаптарын жеңілдетуді көздеп отыр. Бұған кепіл ретінде қабылданатын мүлікке қойылатын аумақтық шектеулерді азайту, қаржылық талдауды оңайлату және несие көлемінің шегін ұлғайту сияқты өзгерістер кіреді.
Сонымен қатар, кейбір банктер сыйақы мөлшерлемесіне әсер етпейтін комиссиялар мен маржаларға қатысты талаптарды қатаңдатқан. Ал шағын және микробизнеске арналған жаңа өнімдер әзірге тестілеу кезеңінде.