Жыл сайынғы Тамыз конференциясы аясында жер-жерде панельдік секциялар өтіп жатыр. Соның бірі мемлекеттік саясаттың негізгі идеясымен үндесетін «Адал азамат» біртұтас тәрбие бағдарламасына арналды. Ы.Алтынсарин атындағы Ұлттық білім академиясы ұйымдастырған жиынға еліміздің барлық өңірінен білім ұйымдарының басшылары, тәрбие ісі жөніндегі орынбасарлар, педагогтер, білім басқармаларының мамандары, әдістемелік орталықтардың әдіскерлері және мемлекеттік мүдделі органдардың өкілдері қатысты.
«Адал азамат: тәрбие экожүйесі және мектеп – отбасы – қоғам синергиясы» тақырыбындағы отырыста қатысушылар былтырғы оқу жылының қорытындысына талдау жасап, жаңа оқу жылындағы басымдықтарды айқындау, мүдделі органдармен ынтымақтастық, тәрбие бағдарламасын жүзеге асырудың тиімді тәсілдері және қоғамда құндылықтарды дәріптеу мәселелерін талқылады. Секция барысында «Адал азамат» біртұтас тәрбие бағдарламасының ғылыми-әдістемелік негіздері, алғашқы нәтижелері, құндылыққа негізделген тәрбие, тәрбие жұмысының нәтижесін бағалауда назардан тыс қалған жоқ. Сондай-ақ ерте кәсіби бағдар, қаржылық сауат, әскери-патриоттық тәрбие, қауіпсіздік мәдениеті және ата-аналармен жұмысты жетілдіру бағыттарында баяндамалар ұсынылып, мектеп тәжірибесінен үздік жобалар таныстырылды.
Бұған дейін республикадағы барлық мемлекеттік мектепке «Біртұтас тәрбие» тұжырымдамасы енгізіліп, орта білім ұйымдарында тәрбие жұмыстары аталған бағдарлама негізінде жүргізіліп келді. Енді алғаш рет биылғы 1 қыркүйектен бастап сол тұжырымдаманың жалғасы ретінде «Адал азамат» біртұтас бағдарламасы еліміздегі бүкіл оқу ошағына, жекеменшік мектептерге де міндетті болмақ. Бағдарламаның мазмұны жаңартылып, Мемлекет басшысының «Адал азамат – адал еңбек – адал табыс» идеологиялық қағидасымен үндестірілген. Жұмысты үйлестіруші Ы.Алтынсарин атындағы ҰБА таратқан ақпаратқа сүйенсек, меншік нысанына қарамастан, барлық мектепке міндетті енгізілуі тәрбие жұмысының ел көлемінде бірізді стандартпен жүргізілуіне және барлық оқушыға тең орта қалыптастыруына мүмкіндік береді. «Адал азамат» бағдарламасының мақсаты – адал, еңбекқор, елжанды азаматтар тәрбиелеу. Тәрбие жүйесі жалпыұлттық құндылықтарға негізделіп, мектеп, ата-ана және қоғам арасындағы байланысты нығайтуға бағытталады.
Осыған орай барша мектепке арналып бірыңғай визуалды стандарт – брендбук әзірленеді. Мектептің ішкі келбеті ұлттық тәрбиелік құндылықтар мен мәдениетті бейнелейтін ортаға айналады. Тәрбие жұмысын жүзеге асыруда барлық тараптың өзара бірлесе қызмет атқаруына ерекше көңіл бөлінеді. Мектептердегі тәрбие ісі мемлекеттік органдармен, құқық қорғау, денсаулық сақтау, ішкі саясат саласындағы құрылымдармен тығыз байланыста жүргізіледі. Ай сайын белгіленген тақырыптар сабақ пен сыныптан тыс іс-шараларды бір-бірімен сабақтастырады. Мысалы: әділдік, еңбекқорлық, патриотизм сынды құндылықтар оқу үдерісінің өзегіне айналмақ. Осы бағытта мектеп өміріне «Өнегелі 15 минут», күй әуенімен қоңырау соғу, ұлттық ойындар секілді жаңа форматтар енгізіледі. Сонымен қатар оқушының мектептен тыс өмірлік тәжірибесін байытуға да ерекше көңіл бөлінеді.
Жиын барысында «Қазақ газеттері» ЖШС бас директоры, академик Дихан Қамзабекұлы БАҚ пен «Адал азамат» бағдарламасының идеологиялық үндестігі турасында, Ы.Алтынсарин атындағы ҰБА вице-президенті, педагогика ғылымдарының кандидаты Анар Тәңірбергенова «Адал азамат» біртұтас тәрбие бағдарламасының нәтижелері мен жаңа оқу жылындағы басымдықтар жөнінде, «Білім-инновация» Халықаралық қоғамдық қорының вице-президенті Арофат Әбдіхалықұлы «Құндылыққа негізделген тәрбие: зерттеулер мен тәжірибе» тақырыбында мазмұнды баяндама жасады. Олардан өзге де спикерлер өз тәжірибесін бөлісіп, ойын ортаға салды. Солардың бірі сессияда сөз алған Республикалық Аналар кеңесі төрағасының орынбасары Баян Ахатай ата-аналарға бағытталған тәрбие жұмыстары арқылы қоғамда адал азаматтарды тәрбиелеу бүгінгінің басты талабы болып тұрғанын айтты. Оның ойынша, «Адал азамат – адал отбасында тәрбиеленеді. Адал отбасы – әділ қоғамның іргетасы» идеяларын ілгерілете отырып, мақсатты аудитория ретінде ата-аналарды (ересек тұрғындар), ұстаздар, тәрбиешілер, қоғам белсенділерін, қоғамдық ұйымдар мен жергілікті өзін-өзі басқару органдары өкілдерін қатыстыру маңызды.
«Ересектердің өзара ынтымақтастығын көріп өскен баланың бойында басқаша көзқарастардың қалыптасуы мүмкін емес, сондықтан адал азаматтарды тәрбиелеудің ең басты алғышарты – ересектердің өзара адал қарым-қатынасы, адал әрекеті, әр азаматтың өзіне адалдығы. Бала – айна, өзіміз қандаймыз – бала сондай. Олардан өзіміз көрсеткен нәрсенің жемісін ғана күте аламыз. Қазақ халқы сондықтан да тәрбиені екі-ақ түрге бөліп қарастырған: көргенді, не көргенсіз. Нәтижеге, қол жеткізу үшін білім ұйымдарымен бірлесіп ата-аналарға арналған тренинг, психологиялық семинар, қоғамдық акция, вебинарлар, «Әкелер кеңесі», «Аналар кеңесі» төрағаларымен бірлескен отырыстар өткізген орынды.
Секцияның екінші бөлімінде жиналғандар бес интерактивті кейс-сессия аясында тәжірибе алмасты. Онда тәрбие экожүйесіндегі өзекті мәселелер мен шешу жолдары, мемлекеттік органдармен ықпалдастық, ата-аналарға педагогикалық қолдау, балалардың жеке қауіпсіздігі және отбасы мен мектептің бірлескен білім беру кеңістігін құру тақырыптары қамтылды.