Елорда Ұлттық академиялық кітапханасында Абай Құнанбайұлының 180 жылдық мерейтойына арналған «Абай – тұтас бір әлем» атты кітап көрмесінің таныстырылымы өтті.
Көрмеде Абай Құнанбайұлының шығармашылық мұрасы – өлеңдері мен қара сөздері, аудармалары мен философиялық ой-толғаулары кеңінен насихатталған. Келелі көрмеге 184 кітап, 4 дәйекті сөз (цитата) және 8 сурет қойылып, экспозиция бірнеше тақырыпта қарастырылған.
Атап айтсақ, «Қалың елім, қазағым» бөлімінде Абайдың әр жылдары жарық көрген өлеңдер жинақтары мен 1909 жылы Санкт-Петербургте шыққан алғашқы басылымнан бастап, кейінгі толық жинақтар қамтылған. Ал «Абай және музыка» бөлімінде – Абайдың ән мұрасы, музыкалық ықпалы, сондай-ақ әндерінің кейінгі опералық, симфониялық шығармаларға арқау болғаны көрініс тапты. Сонымен қатар «Абай – әлем тілдерінде», «Абайдың дүниетанымы», «Абай мұрагерлерінің еңбектері» атты бөлімдер хакім әлемін жан-жақты ашуға бағыт- талған.
Келелі іс-шарада белгілі жазушы, абайтанушы-мұхтартанушы, майдангер, ұстаз Кәмен Оразалиннің (1920–2008) «Абайдан соңғы арыстар» атты үш томдық кітабының таныстырылымы өтті.
«Абайдан соңғы арыстар» роман-трилогиясы – биыл туғанына 105 жыл толып отырған жазушы Кәмен Оразалиннің қазақ халқының даңқты перзенттерінің ел тәуелсіздігі үшін күрескен күрделі кезеңін суреттеген шығармасы.
Романда «Алаш» көсемдері Әлихан, Ахмет, Жүсіпбек, Халел, Әлімхандардың халыққа жасаған еңбектері жан-жақты бейнеленіп, Шәкәрім, Абай баласы Мекайіл, Мұхтар Әуезов болмысы әртүрлі образдармен жаңаша сомдалған.
Іс-шараға филология ғылымдарының докторы, абайтанушы Тұрсын Жұртбай, филология ғылымдарының докторы, профессор Серік Негимов, тарих ғылымдарының докторы, профессор, Еуразия университетінің ректоры Ерлан Сыдықов сынды зиялы қауым өкілдері қатысып, елеулі шығарманы жан-жақты талдап, лебіздерін білдірді.