Жезқазған қаласындағы С.Қожамқұлов атындағы қазақ музыкалық театрында І республикалық Қойлыбай әулие атындағы «Қобызым – қоңырым» атты қобызшылар байқауы өтті.
Байқауды ұйымдастырушы – осы өңірдің тумасы, мәдениет қайраткері, Қарағандыдағы Қ.Байжанов атындағы концерттік бірлестіктің «Арқа сазы» фольклорлық ансамблінің көркемдік жетекшісі Байғара Хамзеұлы. Ол осыған дейін Ерден Сандыбайұлы атындағы дәстүрлі республикалық қылқобызшылар байқауын өткізіп келген. Биыл Қойлыбай әулие атындағы қобызшылар байқауын қолға алды.
Байқауға еліміздің, Жетісу, Ұлытау облыстары, Алматы, Астана, Қарағанды, Талдықорған қалаларынан келген он екі өнерпаз қатысты.
Құрманғазы атындағы қазақ ұлттық консерваториясының профессоры, Қазақстанның еңбек сіңірген қайраткері, қобызшы Базархан Қосбасаров төраға болған қазылар алқасының құрамында өнердің жілігін шағып, майын ішкен майталмандар болды. Құрманғазы атындағы Ұлттық консерваторияның профессоры, Қазақстанның еңбек сіңірген қайраткері, күйші Ермұрат Үсенов қатарлы тағы басқа қобызшылар үміткерлердің шеберлігін сынады.
Қатысушылардың бәрі кәсіби қобызшылар. Бірі магистрант, бірі ұстаз, бірі ансамбльде ойнайды. Олар «Қорқыт» күйін орындады.
Қойлыбай әулие атындағы қайырымдылық қоры, Ақсақалдар қауымдастығының төрағасы Абулайс Түсіпбекұлының айтуынша, «аты аңызға айналған әулие бабамыз аманаты бойынша Ұлытау өңіріндегі Дулығалы өзенінің бойында жерленген. 1994 және 2023 жылдары әулиенің аруағына бағышталып, ас берілді. Қойлыбай әулиенің басына келімді-кетімді кісілер тоқтайтын бес бөлмелі «Тағзым үйі» салынды. 2024 жылдың тамыз айынан бастап бұрынғы кесененің орнына зәулім кесене салынып жатыр. Жошы хан, Домбауыл, Алашахан сияқты Қойлыбай әулиенің басына туристік орын жасауға болады», деп орынды ұсыныс айтты.
Жеребе бойынша шыққан әр қобызшы төрт шығармадан орындады. Алғашқысы арнайы байқауға жазылған Ә.Әбдінұровтың «Дулығалы өзен», Е.Үсеновтің «Қойлыбай әулие» күйлері, үшіншісі өз таңдауы бойынша қобызға арналған күй, төртіншісі конвертке жасырған шығарманы орындау. Ұлтымыздың киелі аспабының сырлы да, сиқырлы сазы тыңдаушыларды баурады.
Бас жүлде 1 500 000 теңге ақшалай сыйлықты Әсен Смаил (Талдықорған қаласы) олжалады. І орын алған Әділет Азбаев (Алматы қаласы) 1 млн теңге, ІІ орын алған Олжас Құрманбек (Астана қаласы) 500 000 теңге иеленді. ІІІ орын алған жетісулық Ерасыл Төреханов пен қарағандылық Аяулым Жетпісбаеваға да ақшалай сыйлық бұйырды.
Ұлытау облысы