Алматы маңындағы Қарасай ауданына қарасты Кемертоған ауылында ауызсу мәселесі көп жылдан бері шешілмей келеді. Мәжіліс депутаттары Максим Рожин мен Данияр Қасқарауов өңірге жұмыс сапары аясында ауыл тұрғындарымен кездесті, деп хабарлайды Egemen.kz.
Тұрғындардың айтуынша, орталықтандырылған су жүйесі болғанымен, оның техникалық жағдайы өте нашар. Құбырдағы су қысымы тым әлсіз, ал кейбір көшелерге мүлде жетпейді. Тұрғындар суды түнде ыдыстарға жинап, күн тәртібін соған бейімдеуге мәжбүр. Мәселе тек оның қолжетімсіздігінде ғана емес, сапасына да қатысты. Қоғам белсендісі Раушан Жұматаева көптеген жекеменшік ұңғыма өз бетімен, санитарлық нормаларды сақтамай қазылғанын айтты.
«AMANAT» партиясы фракциясының мүшесі Максим Рожин бұл мәселе алғаш рет бір жарым жыл бұрын Қаскелеңдегі қоғамдық қабылдауда көтерілгенін атап өтті. Ол кезде 20-дан астам мәселе тіркеліп, олардың басым бөлігі шешілген. Алайда қазір ең өзекті ауызсу мәселесі қалып отыр.
«Қазір ауылда 4500-ден астам үй орталық су жүйесіне қосылмаған. Тұрғындар әртүрлі тарифпен, сапасы күмән тудыратын жеке ұңғымалардан су тұтынып отыр. Қажетті құжаттар мен жер телімі дайын. Енді басты мақсат – республикалық бюджеттен қаржы тарту. Бұл мәселе Үкімет қарауына ұсынылды. Премьер-министр тарапынан бақылауға алынды. Бюджет нақтыланғанда қаржы бөлінуге тиіс. Бұл мәселе «AMANAT» партиясының тікелей бақылауында. Партияның «Халықпен бірге!» сайлауалды бағдарламасында инфрақұрылымды жаңғырту негізгі басымдықтардың бірі ретінде белгіленген», деді М.Рожин.
Жобалық-сметалық құжаттамаға сәйкес, ұзындығы 184,8 шақырым болатын су құбыры, екі су қоймасы, үш насос станциясы, дизельді генератор мен трансформаторлық қосалқы станция салу жоспарланған. Құрылыс аяқталғаннан кейін шамамен 20 мың адам таза ауызсуға қол жеткізетін болады.
Қарасай ауданында осындай жобалар кезең-кезеңімен жүзеге асырылуда. Қазір Жаңатұрмыс пен Қаратөбе ауылдарында су құбыры желісі салынып жатыр. Сондай-ақ Елтай, Жармұхамбет, Шалқар және Қайрат ауылдарында да құрылыс жұмыстары басталған. Бұл жобаларға 1,7 миллиард теңге бөлінген.