Елордадағы Л.Н.Гумилев атындағы Еуразия ұлттық университетінде аса көрнекті журналист, Қазақстанның Халық жазушысы, қоғам қайраткері Шерхан Мұртазаның аудиториясы ашылды. Салтанатты рәсімге Сенат пен Мәжіліс депутаттары, мемлекет және қоғам қайраткерлері, еліміздің журналистика саласының ардагерлері, белгілі ақын-жазушылар мен бұқаралық ақпарат құралдарының өкілдері, сонымен қатар шетелдік серіктес жоғары оқу орындарының ғалымдары қатысты.
Шерхан Мұртазаның отандық журналистика мен әдебиеттің дамуына қосқан үлесін айғақтайтын бұл аудитория осы оқу орнының ғана емес, елорданың кәсіби-интеллектуалдық орталығы болмақ.
«Белгілі қайраткер Шерхан Мұртаза атындағы аудиторияның ашылуы – бүкіл қоғамға ой салатын, үлгі болатын іс-шара. Білікті журналистер, білімді азаматтар осы аудиторияда Шер-ағаның рухына тағзым етіп, үлкен әсер алса екен деген оймен ашып отырмыз», деді ЕҰУ ректоры, академик Ерлан Сыдықов.
Іс-шара барысында Шер-ағаның ізбасарлары Сенат депутаты Нұртөре Жүсіп, қоғам қайраткерлері Уәлихан Қалижанов, Дархан Мыңбай, қаламгер Жарылқап Бейсенбайұлы, Мәжіліс депутаттары Қазыбек Иса, Жанарбек Әшімжан, «Қазақ газеттері» серіктестігінің директоры, академик Дихан Қамзабекұлы, «Хабар» агенттігі басқарма төрағасы Кемелбек Ойшыбаев және өзге де зиялы қауым өкілдері тебірене сөз сөйлеп, Шерхан Мұртазаның қайталанбас тұлға, көрнекті жазушы, талантты публицист, шебер аудармашы болғанын атап өтті.
«Шерхан Мұртаза темірқазық ретінде бізге үлгі бола білді. Қайраткерлік, қаламгерлік, журналистік жағынан алсақ та, Шер-ағаның өмірлік жолын жақсы білесіздер. Ол кісінің осында қойылған кітаптарын, мақалаларын оқып, Парламентте сөйлеген сөздерінен, өмір жолынан тағылым алып, Шер-ағаңша жазып, ой айтуға ұмтылатын қазақтың жас журналистерінің толқыны көптеп шыға берсін», деді Нұртөре Жүсіп.
Белгілі қаламгер, академик Уәлихан Қалижанов Шерхан Мұртаза редакторлық еткен шақта қазақ басылымының алтын дәуірі орнағанын, газеттің оқылымды болуына, оқырманды көбейтуге өлшеусіз үлес қосқанын атап өтті.
Дихан Қамзабекұлы «Егеменнің» шын мәнінде егемен болуына Шерхан Мұртаза қалыптастырған мықты дәстүрдің әсер еткенін баса айтты. Сондай-ақ көрнекті жазушы, журналист әрі бірегей қоғам қайраткері атындағы аудиторияның ашылуын – мемлекеттік маңызы бар іс әрі кәсіби көрегендіктің көрінісі екенін жеткізді.
Биыл 35 жылдығы аталынып өтіп жатқан «Ana tılı» газетінің тұңғыш редакторы, түркітанушы Жарылқап Бейсенбайұлы «Шерхан Мұртаза мен Сейдахмет Бердіқұлов сынды ұлт журналистикасындағы дара тұлғалар атындағы аудиторияның қатар орналасуы бәрімізді қуантып отыр. Расында, барды бағалау мен қалам дарабоздарын қадірлеу – елдік борышымыз» деді.
Университеттің журналистика және әлеуметтік ғылымдар факультетінде ашылған бұл аудитория заманауи техникамен жабдықталған. Бұған Жамбыл облысының әкімдігі тікелей қолдау білдіріпті. Аудитория болашақ журналистерге білім және зерттеу алаңы ретінде қызмет етпек. Мұнда жазушының өмірі мен шығармашылығына арналған деректі экспозициялар, фото және бейнематериалдар, архивтік дереккөздер қойылған.