Жапонияның Фукуока қаласында өткен әйелдер арасындағы Азия чемпионатында Қазақстан құрамасы регби-15 бойынша қола медаль жеңіп алды, деп жазады Egemen.kz.
Құрлықтық додада шеберлігімен көзге түскен отандастарымыз үшінші орын үшін болған тартысты бәсекеде Гонконг құрамасымен жолығып, қарсыласына 12:29 есебімен есе жібергенімен, турнирдің жалпы нәтижесі бойынша құрмет тұғырынан көрінді.
Бірінші таймда Гонконг ойын тізгінін толықтай өз қолына алып, есепте алға шықты. Ал екінші таймда отандық спортшы қыздар есеп айырмасын қысқартуға бар күшін салды. Дегенмен, қарсылас команда шеберлік пен уақытты ұтымды пайдалана отырып, жеңісті уысынан шығармады.
Соған қарамастан, Қазақстан әйелдер құрамасының биылғы чемпионаттағы өнері құрлықтағы үздіктер қатарына қосылуға толық негіз берді. Қола медаль – жүйелі дайындықтың, жанқиярлықпен төгілген тер мен табанды еңбектің жемісі.
Айта кетейік, Азия чемпионатының финалдық ойыны 25 мамырда өтеді. Онда Жапония мен Гонконг құрамалары алтын жүлдені сарапқа салады. Ал Қазақстан құрамасы үшін бұл нәтиже – айқын жетістік әрі болашақ жеңістерге серпін беретін маңызды кезең.