ІІМ Ұлттық ұланы Академиясының курсанты Асқар Жалеловтің отбасы ұзақ жылдардан бері әскери қызмет атқарып келеді, деп жазады Egemen.kz.
Арғы атасы – Төкеш Өтеғали екінші дүниежүзілік соғысқа қатысса, атасы – Жалел Төкешов Самарқан қаласында радиобайланыс саласында қызмет еткен, ал, әкесі – Кенжебек Төкешов Ұлттық ұлан қатарында полковник шенінде қызмет етеді. Бала күнінен Отан қорғау ісіне құштар болған ол әскери саладағы радиобайланыс маманы ретінде білім алып жатыр. Осылайша, саладағы қызмет 4 атаға жалғасып, бір әулет әскери династияға айналған.
Ұлттық ұланның баспасөз қызметінің мәлімдеуінше Асқар Жалелов – үздік курсант. Қазіргі уақытта ол ішкі істер органдарының байланыс жүйесіне жасанды интеллектіні енгізу бойынша инновациялық жоба дайындап жатыр.
«Мұның бір артықшылығы – адам факторын болдырмайды. Жобада жүз пайызға дейін бет-әлпетті тану функциясын қамтамасыз ету жоспарланған. Бұл жүйе Ұлттық ұланға енгізілген Hytalkpro кешені арқылы ұйымдастырылады», дейді курсант А.Жалелов.
Қазіргі уақытта Академияда 700-ге жуық курсант білім алады екен, арасында Тәжікстаннан келіп оқып жатқандар да бар.