Алматыда өнерсүйер қауым ерекше рухани кештің куәсі болды. А.Жұбанов атындағы дарынды балаларға арналған республикалық мамандандырылған музыка мектебінің «Giovani Talenti» камералық оркестрі еліміздің композиторлары шығармаларынан құралған жаңа жинақтың тұсаукесер концертін өткізді.
Жас таланттардан тұратын «Giovani Talenti» камералық оркестрінің репертуарындағы «Қазақстан композиторларының шығармалары» жинағын өнертанушылар жылы қабылдады. Жоба Мәдениет және ақпарат министрлігінің қолдауымен жүзеге асырылған «Тәуелсіздік ұрпақтары» мемлекеттік гранты аясында жарық көріп отыр.
Жинаққа енген туындылар — өнерге өз өрнегімен келген талантты жас композиторлардың камералық оркестрге арналған шығармаларын қамтыған. Жоба авторлары жинақты шығарудағы мақсат дарынды музыканттарға қолжетімді, әрі сапалы ұлттық репертуар ұсыну болғанын айтады. Өнертанушылардың сөзінше, жинақ болашақ өнерпаздардың кәсіби дамуына, ұлттық музыканы терең тануына ықпал етпек.
Кеште «Giovani Talenti» оркестрі Ахмет Жұбанов атындағы музыкалық мектептің 25 шәкірті өнер көрсетті. Олар Бах, Чайковский, Григ сияқты классиктердің туындыларын, сондай-ақ отандық композиторлардың премьералық шығармаларын орындап, көрермен ықыласына бөленді.
Шеберлік пен шабыт тоғысқан оркестрге халықаралық деңгейдегі дирижер, Құрманғазы атындағы Қазақ ұлттық консерваториясының түлегі, «Тәуелсіздік ұрпақтары» грантының жеңімпазы Аршат Шәріп жетекшілік етті. Кеш шымылдығын П.И.Чайковский атындағы Мәскеу мемлекеттік консерваториясының түлектері — Карина Измайлова мен Абылай Нұрлыбек ашып, олардың кәсіби орындау шеберлігі мен сахна мәдениеті көрермендерге рухани демалыс сыйлады. Іс-шара еліміздегі академиялық музыка мектебінің негізін қалаушы, ұлт мәдениетінің алыбы Ахмет Жұбановтың туған күніне орай ұйымдастырылып отыр.
«Ұлы ұстаздың өнер мұрасын ұлықтау — бүгінгі ұрпақтың парызы. Музыка тілі адамзат баласын бір-біріне жақындастыратын құдірет. Өнерде шекара болмайтыны сондықтан. Халқымыздың рухани бай мәдениеті ұлттық музыкамыздың өзегінде жатыр. Оны заманға сай түрлендіру, әрі қарай дамыту – жас композиторларға жүктелетін жауапты міндет. Жобаға қолдау көрсеткен жандарға алғыс айтамыз», дейді «Мәдениет» бағыты бойынша «Тәуелсіздік ұрпақтары» мемлекеттік грантының жеңімпазы Аршат Шәріп.
Айтулы кеш Құрманғазы атындағы қазақ ұлттық консерваториясы ұсынған «Дәуірлер үндестігі» көрмесіне ұласты. Көрме ұлт аспаптарын орындау мен зерттеп-зерделеуді биік белеске көтерген еліміздің композиторлық мектебін қалыптастырушы, алғашқы кәсіби музыкатанушы Ахмет Жұбановтың өмір тынысы мен шығармашылық мұрасынан сыр шертеді. 1945 жылы А.Жұбановтың басшылығымен консерваторияда Халық аспаптары кафедрасы құрылып, кафедра 1980 жылы Халық аспаптары факультеті ретінде аясын кеңейткен болатын. Ұлтымыздың кәсіби ауызша орындаушылық дәстүрлерін жандандыру мақсатымен факультет жанынан 1987 жылы ашылған «Халық әні» кафедрасы да өнер кеңістігінде қаншама таланттарды қанаттандырған киелі шаңырақ.
АЛМАТЫ