Орал қаласында тұратын белгілі бағбан, Сергей Исаев атындағы эксперименталды коллекциялық питомник-бақтың иесі Қайрат Кәрімов 1 500 түптен аса алма көшетін тегін таратты.
Өткен жылы Батыс Қазақстан өңірі алапат су тасқынын бастан кешірді. Соның ішінде Орал қаласының маңында тұратын саяжай иелері қатты зардап шекті. Қайраттың өзінің де тәлімбағы екі айдай су астында тұрды. Шаған өзені жағасында орналасқан аумағы 7,6 гектар болатын бұл бақта алманың қатаң континенталды климатқа арналған 200-ден аса сорты, 80 түрлі алма телтүбірі (подвой), жүзімнің 200-ден аса ерекше түрі, сондай-ақ декоративті, емдік қасиеті бар теректер мен бұталар, қылқанжапырақты ағаштың бірнеше түрі өсетін. Дәл мұндай генофонд, ерекше тәлімбақ еш жерде жоқ еді. Өкінішке қарай, көпжылғы еңбектің көбі еш кетті, көп терек су астында тұншығып қалды. Қазір Қайрат жары Розамен бірге ерекше тәлімбақты қалпына келтіруге күш салып жатыр.
– Былтырғы табиғат апатынан біз ғана емес, көптеген саяжай иелері көпжылғы жеміс ағашынан айырылды. Олардың мұң-мұқтажын бізден артық білетін кім бар? Сондықтан алманың әр түрінен, біздің жерімізге, қатаң табиғатымызға үйренген сорттарынан 1 500-ден аса түп көшетті тегін таратуға шешім қабылдадық, – дейді Қайрат Боранбайұлы.
Қайраттың бұл бастамасына оралдықтар қатты риза болды. Әйгілі бағбанның қолынан алма көшетін алуға алыс-жақыннан арнайы келгендер аз болмады. Бақ иесі келушілерге жеміс ағаштарын өсіру, күтіп-баптау туралы ақыл-кеңесін аямады. Осылайша, бағбанның қарапайым акциясы қайырымдылыққа тұнған керемет іс-шараға айналды.
Батыс Қазақстан облысы