Роза Бағланова атындағы «Қазақконцерт» мемлекеттік академиялық концерттік ұйымында биші, «Гүлдер» ансамблінің әртісі Іңкәр Айдарханқызының жеке өнер кеші өтті.
Концерттік бағдарламада қазақ ұлттық және әлем халықтарының билері, заманауи хореографиялық шығармалар, сондай-ақ еліміздің жетекші хореографтарымен бірлесе әзірленген эксклюзивті және жаңа қойылымдар ұсынылды. Атап айтқанда, «Тоқымқағар», «Желдірме», «Былқылдақ», «Ақ жауын», «Алтынай», «Тибет биі», ұйғыр және басқа да билер орындалды.
Мәдени іс-шараға Қазақстанның халық әртісі Секен Тұрысбеков, Қазақстанның еңбек сіңірген қайраткері Ардақ Балажанова, «Дарын» Мемлекеттік жастар сыйлығының лауреаттары Асқар Мұқият пен Әлібек Әлмәдиев, Мәдениет саласының үздігі Бауыржан Бекмұханбет, «Temirlan&Yernat» дуэті, қобызшы Олжас Құрманбек, халықаралық байқаулардың лауреаты Меруерт Тұрсынбек, талантты музыкант Нұрмұхаммед Cәтен және «Gulder» ансамблі қатысты.
Концерттік бағдарламаның режиссері – Думан Әкім, идея авторы – «Гүлдер» ансамблінің бас балетмейстері Анвара Садықова, қоюшы хореографтар – Алмат Шамшиев, Ернұр Қарықбол, Анна Цой.
Кеш авторы Іңкәр Айдарханқызы бүгінде «Гүлдер» ансамблі балет труппасының көшбасшысы ретінде өзін жақсы қырынан танытып келеді. Ансамбльдің жаңа репертуарын жылдам меңгеріп, жеке репертуарындағы «Жетісуым», «Мен қазақтың қызымын», «Алтынай», «Толғау» билері кәсіби өнер қайраткерлері мен көрерменнің жүрегінде айқын із қалдырды. Ал композитор Секен Тұрысбековтің «Көңіл толқыны» күйі негізінде қойылған хореографиялық композиция шетел көрерменінің ерекше қолдауына ие болды.
Іңкәр Айдарханқызы қазақ әйелдеріне тән ұлттық биді терең әрі дәл орындап, оны түсіндіруде жоғары шеберлігін көрсетеді. Бұл – оның орындаушылық өнеріндегі басты ерекшеліктерінің бірі. Сонымен қатар репетитор, хореограф және балетмейстердің көмекшісі ретінде де өз қабілетін танытып жүр. Бұл тәжірибе, әсіресе, Астана қаласындағы Жас көрермендер музыкалық театрында қойылған «Қыз Жібек» қойылымында айқын байқалды.
«Егемен-ақпарат»