«Қазгидромет» РМК ел аумағында ақпан айында ауа райы қандай болатынын айтып, көктемге мезгілдік болжамын ұсынды, деп жазады Egemen.kz.
Синоптиктердің мәліметінше ақпанда ауа райы құбылып, температура жыл сайынғы нормадан 1-2 градус жылы болады. Алайда ақпанда ел территориясын аяз айналып өтпейді.
Айдың алғашқы онкүндігінде күн райы құбылып солтүстік-шығыс өңірлерде температура көрсеткіші күндіз - 4, - 16 градусты көрсетсе, екінші, үшінші онкүндік аязды болады. Жауын-шашын норма мөлшерінде болады деп болжанып отыр.
Ал Астана қаласында ақпан айының басы мен үшінші онкүндіктің ортасында қарлы боран соғуы ықтимал.
Алматы қаласы мен облыста ақпандағы орташа температура - 0,8, - 11,3 градус шамасында болады.
Күннің күрт суытуы ақпанның алғашқы онкүндігінің соңында күтіледі. Таулы аймақтарда -20 градусқа дейін аяз болады. Айдың үшінші онкүндігінде жауын жауады деп болжанған.
Оңтүстік циклондардың пайда болуына байланысты ауа температурасы оңтүстік облыстарда +5, +15 градусқа дейін көтеріледі.
Синоптиктер көктем лебі оңтүстік аймақтарда ақпанның соңғы онкүндігінде сезіле бастайды деп болжайды.
«Наурыз айында Қазақстан аумағындағы ауаның орташа температурасы нормадан 2° жоғары болады деп болжанып отыр. Жауын-шашын мөлшері еліміздің басым бөлігінде нормадан көп жауады», делінген «Қазгидромет» РМК хабарламасында.