Моноспектакльдегі мөлтек сыр

Айтулы кеш ақын рухына тағзым етіп қана қоймай, поэзияның сахнадағы өмір­шеңдігін тағы бір дәлелдеді. Сұлтан Сраиыловтың шығар­машылық идеясы негізінде дүниеге келген бұл жоба – дәстүрлі спектакльден гөрі поэтикалық сырласу форматына жақын. Қойылым режиссері Ұлан Ахметов, композиторы Тұрсынжан Шапай. Ал басты бейнені Қазақстанның еңбек сіңірген қайраткері Сафуан Рысбайұлы сомдап, көрерменді ақынның жан дүниесімен жүздестірді. Сахнада оған Дархан Дүйсенов, Күнекей Мұхтархан, Ариза Асқарова, Қарақат Шындәулет және Әсем Мұратова серік болды.

«Мұқағали» моноспектаклі – өмір­баян­дық баяндау емес, бұл – ақынның жан әлеміне үңілуге жасалған көркем талпыныс. Біздің мақсат – көрерменге дерек айту емес, сезім сыйлау болды. Мұқағали поэзиясы – тұнып тұрған эмоция, ішкі дауыс, адам жанының арпалысы. Сахналық шешімдерді барынша ықшам ұстап, сөз бен үнсіздіктің қуатына сүйендік. Себебі Мұқағалиды артық қимылмен емес, жүрекпен оқу керек. Бұл қойылым – ақын­мен сырласу, көрерменді де сол сырласуға шақыру», дейді қо­йы­лым режиссері Ұлан Ахметов.

Моноспектакльде сөз, үн­­сіз­дік және ішкі эмоция үндесіп, Мұқағалидың махаббатқа, тағдырға, уақыт пен жалғыз­дыққа қатысты терең тол­ға­ныстары поэзия тілімен өрілді. Қойылымның ықшам пішіні көркемдік қуатты әлсіретпей, керісінше, әр сөздің салмағын арттыра түскен. Небәрі қырық бес минутқа сыйған сахналық шешім көрерменді бір сәтке де бейжай қалдырмады.

Қазақстанның еңбек сіңірген қайраткері Сайлау Қамиев поэтикалық жанрдың қазақ болмысына жақындығын атап өтіп, актердің Мұқағали поэзия­сын сахнада «тірілте» білгенін жоғары бағалады. Оның айтуын­ша, қысқа да нұсқа қойылым жүрекке жол табатын әсерімен құнды.

Басты рөлді сомдаған Са­фуан Рысбайұлы бұл жұмысты ақын жан дүниесімен сырласу деп сипаттайды. «Мұқағали – сарқылмайтын әлем. Бір кіта­бының өзінде адам өміріне қа­тысты барлық тақырып бар. Біз сол терең мұхиттың бір ғана там­шысын ұсындық», дейді актер.

Кеш соңында жұртшылық әртістерге тік тұрып қошемет көрсетті.

Жетісу облысы