Мемлекет басшысы Қасым-Жомарт Тоқаевтың тапсырмаларын орындау аясында елімізде жаңа газ кен орындары өнеркәсіптік пайдалануға енгізілді. Бұл туралы Энергетика министрі Ерлан Ақкенженов хабарлады, деп жазады Egemen.kz.
Президент өз Жолдауында газ саласындағы басты міндеттердің бірі – қуаттылықты арттыру және газ тасымалдау бағыттарын әртараптандыру екенін атап өткен болатын. Үкімет үшін халықты және экономиканы тұрақты газбен қамту – негізгі басымдықтардың бірі болып қала береді.
Министрдің айтуынша, қазіргі кезеңдегі басты міндет – ресурстық базаны кеңейту және өңдеуді дамыту. Бұл бағытта «2029 жылға дейінгі газ саласын дамытудың кешенді жоспары» жүзеге асырылып жатыр.
Ерлан Ақкенженовтің дерегінше, елімізде Рожковское, Үріктау Шығыс және Анабай кен орындары өнеркәсіптік пайдалануға берілді. Сондай-ақ ірі газ өңдеу зауыттарының құрылысы қарқынды жүріп жатыр. Олар Қашаған, Қарашығанақ және Жаңаөзен кен орындарында салыну көзделді.
Каспий қайраңындағы Қашаған кен орнында қуаттылығы жылына 1 млрд м³ болатын газ өңдеу зауытының құрылысы басталған. Жоба 2026 жылы аяқталуы тиіс.
Бұдан бөлек, биыл мамыр айында «Бейнеу – Бозой – Шымкент» магистральдық газ құбырының екінші желісінің құрылысы басталды. Бұл еліміздің газ тасымалдау жүйесін айтарлықтай күшейтпек.
Сарапшылардың пікірінше, жаңа кен орындарының іске қосылуы мен өңдеу зауыттарының салынуы еліміздің газ саласын жаңа деңгейге шығарып, ішкі сұранысты қамтамасыз етумен қатар, экспорттық әлеуетін де арттырады.