Рухы асқақ, тұғыры биік

Бір-бірімен тығыз бай­ланыс­ты болса да, үлкен ғалым атану – бір басқа да, ғы­лымды басқару бөлек әлем. Ғылымды қара нардай жүгін арқалаған, қыр-сырын білетін, ерекшеліктерін терең ұғатын талғампаз тұлға ғана бас­қара алады. Осындай үлгідегі сирек таланттың бірі – Ұлттық ғылым академиясының академигі Сейіт аға Қасқабасов еді.

Сейіт Асқарұлы Астанаға алғаш қоныс аударған 1997 жылдан бері Л.Н.Гумилев атындағы Еуразия ұлт­тық уни­верситетінде ғылымды бас­қарудың қалып­тасқан жүйесін сапаландыруға елеулі үлес қосты.

Азаматтың өмірлік ұста­нымы болады. Сейіт ағаның жақсы ғалымдығына қоса, іскер ұйым­дастырушы да болуы оның туабітті алғырлығынан, еңбек­қор­лығынан деп білемін.

Қазақ КСР Ғылым ака­демия­сы Қоғамдық ғылымдар бөлім­шесінің ғалым-хатшысы, содан соң Қазақстан компартиясы орталық комитеті мен Қазақстан Республикасы Пре­зиденті Әкім­шілігінің жауапты қызмет­кері, кейін Жоғары аттестаттау комис­сиясының төр­ағасы  лауазымында жүргенде ғылыми жұмыс­тарын, соның ішінде фольклортану мен өнертануды назарынан қағыс қалдырып көрмеген біртуар тұлға болды. 

Тарих ақтаңдақтарын қал­пына келтіруге атсалысуды абыройлы парыз деп санаған Сейіт Асқарұлын тарих, әде­биет, мәдениет саласындағы әріптестерімен бірге күллі зия­лы қауым жақсы білді.  

Алматыдағы Әдебиет инс­титуты басшы­лығына ша­қы­рылып, он жыл сонда табысты еңбек еткен соң, қа­ра шаңырағым деп уни­вер­си­тетімізге қайта оралған Сейіт Асқарұлы қазақ әдебиеті ка­федрасының тізгінін ұс­тады. Ол бір кезде өзі ашқан «Еуразия» ғылыми зерттеу орталығы, Шы­ғыстану фа­культеті жұ­мысына ақыл-кеңесін беріп жүрді.

Сейіт Қасқабасовтың аза­мат­тық, ғалымдық келбеті  дегенде,  ол гуманитарлық ғылым әлеміне  еселі еңбек етті.

Сондай-ақ қазақ фоль­­­­­­клор­тану ғылымында өз мек­­те­бін қалыптастырды. Сейіт Қас­қабасовтың есімі мен еңбегі Қазақстанда ғана емес, шетелде де зор ілтипатпен аталады.

Азаматтық айқын ұстаны­мымен, қажырлы еңбегімен   тарих, фольклор, әдебиет, мә­дениет пен руханият сала­ларының өсіп-өркендеуіне өлшеусіз үлес қос­қан академик ел-жұрттың құрметіне бөленді. Соңына том-том ғы­лыми еңбегі мен лайықты шәкірттер­ін қалдырды.

Сейіт Қасқабасовтың  ғиб­рат­ты ғұмыры мен жарқын бейнесі жұртшылық жадында әрдайым сақталады деп се­немін.

Ерлан Сыдықов,

академик