Мемлекет басшысы Қасым-Жомарт Тоқаев елдегі бірлік пен теңдіктің, тұрақтылық пен тыныштықтың рәмізіне айналды деп баға берген Қазақстан халқы Ассамблеясы отыз жылдық толайым тарихты еңсеріп, жаңа мүмкіндіктер мен жетістіктер кезеңіне жол тартты.
Ортақ мүдде мен көзқарас, татулық пен толеранттылық жолында ұзақ жылғы жинақталған тәжірибе мен жанқиярлық еңбек болашақта да алға қойған мақсаттарға жеткізеріне сенім мол. Президент айтқандай, бұл жолда күн сайын көзге көрінбейтін, бірден нәтиже бермейтін, алайда ұзақмерзімді, стратегиялық тұрғыдан тиімді, ауқымды жұмыс жүргізіп жатқан ҚХА мүшелеріне үлкен жауапкершілік артылады. Олардың бірқатарын Мемлекет басшысы Ассамблея сессиясында арнайы марапаттағаны белгілі.
«Жақсы сөз – жарым ырыс» дегендей, ұлысты ұйыстырар этносаралық көпір міндетін атқарып келе жатқан Қазақстан халқы Ассамблеясының ілкімді істеріне қатысты айтылып жатқан ізгі тілек көп.