Мәулен Әшімбаевтың төрағалығымен палата бюросы өтіп, депутаттар 20 ақпандағы Сенат отырысының күн тәртібін бекітті.
Алдағы бейсенбіде өтетін Сенат отырысында депутаттар «Қазақстан Республикасының Үкіметі мен Түркия Республикасының Үкіметі арасындағы өсімдіктер карантині және оларды қорғау саласындағы ынтымақтастық туралы келісімді ратификациялау туралы» заңды қарайды. Заңның мақсаты – фитосанитарлық қауіпсіздікті қамтамасыз ету және екі мемлекеттің аумағында карантиндік зиянды организмдердің әкелінуі мен таралуын болғызбау үшін өсімдіктер карантині және оларды қорғау саласындағы екіжақты ынтымақтастықты дамыту.
Келісімнің күші фитосанитарлық шаралар тұрғысынан, әсіресе халықаралық тасымалдау жағдайларында зянкестер үшін жасырыну орны бола алатын немесе олардың таралуын жеңілдететін кез келген өсімдікті, өсімдік өнімін, жинау орнын, қаптаманы, тасымалдауды, контейнерді, топырақты және кез келген басқа организмді, объектіні немесе материалды қоса алғанда, карантинге жатқызылған барлық материалға қолданылады.
Сонымен қатар бюрода депутаттар Сенаттың іс-шаралар жоспарын іске асыру аясындағы міндеттерді талқылады және бұған дейін Парламент Мәжілісі қабылдаған заңдарды жұмыс үшін палата комитеттеріне бөліп берді.